Peter Samone: “Turizmu Iha Hau Nia Liman”

DILI, STLNEWS.co – Chief of Party, USAID’s Tourism For All Project, Peter Semone hatete katak, setor turizmu importante tebes ba nasaun Timor, tanba turizmu mak bele garante futuru nasaun nian bainhira mina no gas iha tasi Timor maran.

“Turizmu iha hau nia liman. Liu husi aplikasaun telemovel Go Timor, ita bele hatene konaba akomodasaun hanesan, hotel no restorante sira molok halo planu ba vizita fatin turizmu iha Timor,” dehan Peter Samone bainhira lansa aplikasaun telemovel Go Timor iha Night Market, Timor Plaza, Dili, Sabadu horiseik (20/11/2021).

Tuir Peter Samone, lansamentu aplikasaun telemovel Go Timor ho objetivu atu haforsa liu tan programa Turismu Ba Ema Hotu, neebe Ajénsia Estadus Unidus ba Dezenvolvimentu Internasionál (USAID) inisia iha tinan hirak nia laran.

Nia hatutan katak, aplikasaun telemovel Go Timor mak fonte informasaun turizmu konfiavel, neebé foka ba esperiénsia turizmu Timor Leste nian atu oferese ba ema lokál no estranjéiru sira.

Bazeia ba sondajen husi Marketer, aplikasaun telemovel tama iha kategoria setimu aplikasaun neebé ema barak iha mundu prefere atu download ba iha sira nia telemovel, atu nunee sira bele uza hodi asesu ba informasaun fatin turístiku sira molok halo planu ba vizita.

Kuaze 60% utilizadór smartphone mak baibain uza aplikasaun viajen telemovel mundiál, hodi halo planu diak ba sira nia viajen rasik. “Ho telemovel iha liman, ema bele asesu ho fasil ba informasaun konaba fatin, produtus no servisus hirak neebé sira hakarak ba asesu,” dehan Peter Samone.

Nia mos hatete katak, aplikasaun nee ema hotu bele uza no download ho gratuita, nomós gratuita ba negósiu sira atu hatama informasaun konaba sira nia servisus no produtus ho detallu no atualizadu. Aplikasaun nee rasik eziste ona iha telemovel Apple no Android sira atu, nunee ema hotu bele komesa download iha sira nia telefone.

Tuir nia, programa lansamentu aplikasaun telemovel Go Timor nee realiza, tanba hetan apoiu husi Ministériu Turizmu, Komérsiu no Indústria (MTKI), Heineken, Telkomcel, Fone Haus, Compass Diving, East Timor Trading, Air Timor no Dreamers Dive Academy.

Iha serimonia lansamentu nee, sira oferese prémiu ba ema hirak neebé download aplikasaun nee, no asesu ba tiket dada rifa molok ba partisipa lansamentu ofisiál aplikasaun ‘Go Timor’.

Chief of Party, USAID’s Tourism For All Project, Peter Semone iha ninia introdusaun haksolok tebes bele hamosu aplikasaun telemovel Go Timor, hodi promove aplikasaun telemovel turistiku.

Tuir Peter Semone, aplikasaun telemovel “Go Timor” nee kontein ho informasaun atualizadu hirak neebé relevante ba servisus no produtus turizmu iha rai laran, no sai hanesan fonte konfiavel ba turista lokál no internasionál, atu halo planu diak liu hodi ba esplora poténsia naturál, kulturál, istóriku Timor Leste neebé bele kontribui ba rendimentu ekonomia lokál no nasaun.

Diretor Nasional Turizmu Komunitaria no Kultural, Moises Tilman dehan katak, aplikasaun nee sei fasilita implementasaun Polítika Nasionál Turizmu atu estabelese plataforma parseria públiku-privada ba marketing no promosaun.

Nia dehan, aplikasaun nee ajuda no suporta tebes Ministériu Turizmu iha  aktividade promosaun nian. Parseira maka pilár ida husi pilár haat (4) neebé define ona iha polítika nasionál turizmu, nee importante tebes ba dezenvolvimentu indústria turizmu.

“Governu no setór privadu iha objetivu komun ida nee katak, setór privada tenta hela atu dezenvolve sítiu turístiku sira, enkuantu governu fasilita prosesu nee ho legalmente no administrativamente,” katak nia.

 Aspeitu prinsipál husi aplikasaun ‘Go Timor’ nee katak, iha ona mapa Google neebé bele ajuda vizitante sira atu halo planu diak liu ba sira nia viajen, no mapa nee rasik sei liga sira direitamente ho servisus no produtus turizmu nian iha rai laran, neebé sira hakarak asesu, no mós iha aplikasaun nee bele haree informasaun konaba vizitantes dahuluk nian ho detallu.

CEO Telkomcel, Yogi Rizkian Bahar hatete, aplikasaun nee sei ajuda turista sira fiar liután atu rezerva restorante ka otél no produtu ruma, neebé sira hakarak ba asesu no hela ou vizita bazeia ba referénsia husi vizitante dahuluk nian.

“Turista sira sei bele ba vizita hotél ou restorante ida, tanba sira konfia ona informasaun vizitantes dahuluk nian. Ninia impaktu pozitivu mak atu hamoris negósius turizmu no mellora produtus no servisus sira sai kualidade liu tán. Aplikasaun Go Timor nee mak hatene klean liu tán konaba Timor Leste duke Google, tanba informasaun konaba negósiu turizmu hotu – hotu neebé kontein iha aplikasaun nee atualizadu liu,” katak nia.

Digital Marketing Kordenadora, Maria da Costa informa katak, atu asegura aplikasaun Go Timor nia sustentabilidade, parseiru sira sei servisu hamutuk atu finansia aplikasaun nee, no atu asegura ninia sustentabilidade husi tempu mediu ba longu prazu, no sai alvu ba vizitantes ou turistas internasionál.

Nia dehan, iha tinan oin, telkomcel mak sei jere aplikasaun nee no atualiza informasaun hirak neebé foka ba negósiu turizmu Dili, iha tempu agora. Kontaktu [email protected] atu hetan informasaun oinsá negósius turizmu sira, atu inklui sira nia servisus no produtus ba iha aplikasaun.

(yos/mik)

LEAVE A REPLY

Please enter your comment!
Please enter your name here

NEWS UPDATE

Xanana Fila Hikas Ona Mai TL Ho Batik

DILI, STLNEWS.co - Hafoin halao viajen ba Japaun ho Portugal, durante semana 3 hodi halao enkontru lubuk ida, no simu honorariu doctorate 2 husi...

Jornalista Iha Filipina Hetan Tiru, Suspeitu Sei Misteriu

DILI, STLNEWS.co – Jornalista ida mate hetan tiru iha Filipina loron Kuarta horiseik (08/12/2022), bazeia ba informasaun husi grupu advokasia fatin neeba. Nia mak Jesus...

Universidade Katolika TL Iha Lasu No Devosaun Boot

DILI, STLNEWS.co – Ohin governu no lider Igreja Katolika hamutuk ho Premeadu Nobel da Paz, Dr. Jose Ramos Horta halo inagurasaun abertura solene Universidade...