PJR Alfonso Simu Pose Husi PR

DILI, STLNEWS.co – Prokurador Jeral Republika Alfonso Lopes simu pose husi Prezidente Republika, Francisco Guterres Lú Olo, nuudar Prokurador Jeral Republika ba mandatu tinan 4.

“Ita testemuña Prezidente Republika fo posse ba dirijente as liu iha estrutura Ministeriu Públiku nian. Tuir Estatutu Ministeriu Públiku nian, posse nee atu obrigatoriu ida neebe marka loron dahuluk emposadu hahú nia knaar,” dehan Prezidente Republika, Francisco Guterres Lú Olo liu husi diskursu, bainhira fo posse ba Prokurador Jeral Republika Alfonso Lopes, iha Palasiu Prezidensial Nicolau Lobato, Dili, (Kinta 29/04/2021).

Xefe Governu dehan, haree ba alínea k) artigu 86° no n° 3 artigu 133° husi Konstituisaun RDTL , no mós ba artigu 12°, n°1 no n°2 husi Lei n°14 /2005, ho data 16 setembru, altera ho Lei n°11/2011 ho data 28 setembru, kona-ba ba Estatutu Ministeriu Publiku, kompete ba Prezidente Republika nomeia Prokurador-Jeral Republika, hafoin rona Governu.

Prezidente Republika rona uluk Governu molok nomeia Dr. Alfonso Lopes nuudar Prokurador-Jeral Republika foun. Governu la haree buat ruma hasoru nomeasaun nee. Nunee, Dr Alfonso Lopez, enposadu ohin, hahu ninia mandatu husi ohin ba oin, nuudar Prokurador-Jeral Republika ba tinan haat.

Haktuir n°6 artigu 133° Konstituisaun RDTL, hafoin rona Konsellu Superior Ministeriu Públiku, Prezidente Republika ezonera Dr. Alfonsu husi nia kargu nu’udar Prokurador-Jeral Adjuntu. Kargu ida nee sei husik mamuk lae. Iha tempu badak tuir mai mak sei nomeia adjuntus ba Prokurador-Jeral Republika, tuir prosedimentu legal en-vigor.

Foto: Media PR

Tuir n°1 artigu 132° Konstituisaun RDTL, kompete ba Ministeriu Públiku reprezenta Estadu, ezerse asaun penal, asegura defeza ba menor sira, auzente no inkapaz sira, defende legalidade demokrátika no promove kumprimentu lei nian.

Atu bele halao kompeténsia sira nee hotu, Majistratura ida nee tenke iha rekursus umanus ho kapasidade téknika no idoneidade moral atu hasoru dezafiu sira neebe mosu loron-loron iha ita-nia mundu ohin-loron nian. Rekursus umanus mak organizasaun nia rikusoin boot liu.

Dalan importante tebes ida atu organizasaun hetan ninia objetivu mak harii ekipas traballu ho ema neebe teknikamente diak no iha moral as tanba hametin fiar husi ema. Atu hetan susesu, servisu nuudar ekipa importante maibé laos tanba iha ekipa mak iha susesu. Importante iha dirijente sira neebe hatene orienta, koordena, fo instrusaun, kontrola atividade sira neebe membru sira husi ekipa traballu halo hela no ezije prestasaun kontas.

Iha fatin hanesan Prokurador Jeral Republika (PJR), Alfonso lopez dehan, nia senti orgullu tanba simu ona tomada de pose husi Prezidente Republika.

“Hau senti orgullu ba Prezidente Republika neebe maka fo konfiansa no depozita mai hau, hau alegria mos ba iha familia Ministeriu Publiku tomak nomos fo felisidade ba Prokurador Republika sesante, aumesmu tempu iha alegria maibe tenki iha mos responsabilidade, simu kargu ida todan,” dehan PJR Alfonso.*

Reportajen: Natalina Lopes/ Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 21 Setembru: Kazu Pozitivu 67 & Rekuperadu 318

DILI, STLNEWS.co – Sentru Integradu Jestaun Krize (SIJK) ohin relata kazu pozitivu iha ema nain 67 no kazu rekuperadu hamutuk 318. "Kazu detetadu foun neebe relata...

Sai PR Labele Halo Terus Povu

DILI, STLNEWS.co – Tuir lian Komunidade Agostina Soares katak, se mak atu kandidata an ba Prezidente Republika ba tinan 2022-2027, labele halo terus tan povu...

Fundasaun Codiva Haklean Konesementu LGBTI Ba Autoridade Lokal

DILI, STLNEWS.co – Fundasaun Codiva haklean informasaun no konesementu konaba asuntu Lesbian Gay Bisexual Trans Intersex (LGBTI) ba autoridade lokal. Haktuir Diretora Ezekutiva Fundasaun Codiva...
%d bloggers like this: