PM Hatoo Sentidu Kondelensia

DILI, STLNEWS.co – Primeiru Ministru Taur Matan Ruak hatoo sentidu kondelensia ba sidadaun nain 42, neebe lakon vida iha husi inundasaun foin lalais.

Xefe Governu hatoo kestaun nee, bainhira remata halo enkontru semanal ho Prezidente Republika, Francisco Guterres Lú Olo, iha Rezidensia PR Farol, Dili, Kinta (08/04/202).

“Dala ida tan lori Governu nia naran hatoo ami nia profunda no solidaridade, sentidu kondelensia ba familia vitima sira ate ema haat 42 resin rua mak mate, espera katak sira nia klamar hetan fatin diak no tulun sira nia familia sira fo korajen para situasaun agora,” katak Xefe Governu.

Eis Prezidente Republika nee afirma, segundu lugar lori Governu nia naran nomos Primeiru Ministru nia naran rasik manifesta mos solidaridade ba familia hotu, neebe mak terus liu liu familia neebe mak lakon uma, bee lori no lakon sasan durante iha krize nee nia laran.

“Hatete ba sira katak sira la mesak ita hotu oituan-oituan ita kona hotu, maibe halo ita forte liu tan halo ita hamutuk liu tan atu luta hasoru dezafiu sira nee,” dehan Eis Prezidente Republika nee.

Nia esplika, konaba dezastre naturais ema mate 42 no barak mos lakon nia uma oras nee halo hela refujiadu, Governu kontinua haree hodi foti dadus hotu.

Populasaun sira neebe mak lakon sira nia uma mak agora dadaun iha refuziadu iha fatin fatin, naturalmente iha nee iha grupu tolu ou haat, ida mak sira nia uma lakon totalmente.

“Ita sei halo levantamentu atu hatene familia neebe mak lakon uma total nee hira no iha neebe, para ita haree depois para haree tempu oin mai apoiu sira, segundu mak sira neebe mak sei iha uma, grupu tolu ida aat liu, ida aat mediu naton, ida att naton presiza hamos fali, hanesan ita boot sira hatene governu halo levantamentu prepara planu mai oin para ajuda ita nia sidadaun sira bele hadia fila fali ita nia i infrastrutura,” tenik nia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here