PM Relata Preokupasaun Covid-19 Ba PR; Munisipiu 2 Hahu Teste Masal

Primeiru Ministru (PM) Taur Matan Ruak, halo enkontru ho Prezidente Republika (PR) Francisco Guterres Lú Olo, iha loron 11, fulan Fevereiru kotuk. (Foto: Media PR)

DILI, STLNEWS.co – Primeiru Ministru (PM) Taur Matan Ruak, relata preokupasaun Covid-19 no situasaun fronteira ho vasinasaun ba iha Prezidente Republika (PR) Francisco Guterres Lú Olo, iha Palasiu Prezidente Nicolau Lobato, Bairru Pite, Dili, Kinta (18/02/2021).

Xefe Governu dehan, assuntu tolu mak PM hatoo ba PR hanesan atu kontinua estensaun estadu emerjensia ba dala 11 iha fulan oin, segundu konaba situasaun iha lina fronteira oras nee Covid-19 aumenta no munisipiu rua hahu halo ona teste masal, no ikus mak koalia konaba preparasaun vasinasaun ba sidadaun sira.

“Relasiona ho Covid-19 hau hatoo assuntu tolu ba iha Prezidente Republika ida mak konaba estensaun estadu emerjensia, KM deside para fulan oin nee kontinua halo estensaun ida seluk mak konaba situasaun fronteira nia, hanesan ita boot sira hatene liu liu kazu nee aumenta iha entrada Illegal sira neebe deskontrolo oituan tama iha komunidade sira nia leet, agora dadaun halo hela teste masal iha Munisipiu Bobonaro nia no Covalima para ita haree sai ezemplu atu halo inserteza kontaziu komunitariu nee iha ona kalae, nee assuntu ida, no assuntu seluk mak aktualiza mos ba Prezidente konaba preparasaun vasina nia, oinsa mak ita esforsu atu vasina ita nia sidadaun sira iha tempu oin mai” dehan PM Taur Matan Ruak ba jornalista, hafoin remata enkontru ho PR, iha Palasiu Prezidente Nicolau Lobato, Bairru Pite, Dili, Kinta (18/02/2021).

Primeiru Ministru hatutan, desizaun nee remata iha 03 maibe medida levantamentus dadus ezemplu iha kalae kontaziu komunitariu iha kalae, liu liu atividade neebe mak dadaun nee Ministeriu Saude halo mak sertifika laiha kontaziu komunitariu entau levantamentu nee bele halo sedu.

Konaba teste masal oras nee halao dadaun iha munispiu rua Bobonaro no Covalima, tuir informasaun atinje sentu i tall 100 no Bobonaro nia dozentus iha i tal 200.

“Oras nee halo hela teste masal, kuandu rezultadu mai tiha laboratoriu mak foin fo sai nia rezultadu,” dehan PM Taur.

Nunee mos iha loron 15/02, VIII Governu Konstituisional liu husi reuniaun Konsellu Ministru extra ordinariu aprova ona projetu rezolusaun governu nian konaba planu nasional vasinasaun kontra moras Covid-19 no deside ona utiliza tipu vaksin AstraZeneca ba populasaun sira iha Timor Leste.

Proposta nee aprezenta husi Vise Primeira Ministra no Ministra Solidariedade Sosial no Inkluzaun, Armanda Berta dos Santos, nomos husi Komisaun Interministerial ba Elaborasaun no Koordenasaun Ezekusaun Planu Vasinasaun kontra COVID-19, no konta partisipasaun Arvind Mathur, hanesan responsavel ba Organizasaun Mundial Saude (OMS) iha Timor Leste.

Tuir Ministru Prezidensia Konsellu Ministru (MPKM), Fidelis Leite Magalhães katak, iha reuniuan Konsellu Ministru nee aprova ona proposta governu nian konaba planu nasional vasinasaun kontra COVID-19 iha Timor Leste.*

Reportajen: Emerenciana Pinto
Editor: Carme Ximenes

LEAVE A REPLY

Please enter your comment!
Please enter your name here