PM Taur Kontenti Ho Progresu Konstrusaun Portu Tibar

Primeiru Ministru (PM), Taur Matan Ruak informa nia parte senti orgullu ou kontenti tebes ho progresu konstrusaun portu Tibar, tanba iha tinan kotuk hare fatin nee mesak raihenek no tasi deit, maibe ohin loron oin seluk ona. (Foto: Gabineti-Primeiru Ministru)

DILI, STLNEWS.co – Primeiru Ministru (PM), Taur Matan Ruak informa nia parte senti orgullu ou kontenti tebes ho progresu konstrusaun portu Tibar, tanba iha tinan kotuk hare fatin nee mesak raihenek no tasi deit, maibe ohin loron oin seluk ona.

Nia dehan, mai vizita portu Tibar atu halo preparativus sira para haree nia nivel dezenvolvimentu lao oinsa ona no governu, liu liu ministeriu sira neebe iha relasaun ho portu nee tenke halo preparasaun. Tanba iha tinan oin (2022) iha fulan Maio sei intrega ona ba governu.

“Objetivu husi vizita portu Tibar nee primeiru hare nia dezenvolvimentu nee to iha neebe, no tuir informasaun neebe hau hetan dadaun nee konstrusaun atinje ona 45% ona, no parte seluk haree preparasaun saida mak tenki halo tan antes portu nee intrega ba governu buat hotu hotu prontu ona,” dehan Primeiru Ministru (PM) Taur Matan Ruak iha Portu Tibar (08/02/2021).

Xefe Governu informa orgullu ho tebes ho prosesu konstrusaun portu Tibar tanba antes nee iha tinan hira liu ba mai hare fatin nee raihenek no tasi deit, maibe ho konstrusaun Portu Tibar iha mudansa ba fatin refere.

“Hau laos enjineiru maibe hau kontenti los ho dezenvolvimentu portu Tibar nee, tanba iha tinan kotuk hau mai tasi deit, maibe ohin mai fali hare fatin oin seluk ona, tanba ho konstrusaun 0ortu Tibar nee” nia esplika.

Serimonia lansamentu ba konstrusaun portu Tibar halao iha loron 30 fulan Agostu tinan 2018 hosi Primeiru Ministru Taur Matan Ruak ho entidade estadu nian seluk, no tuir projesaun atu termina iha fulan Agostu tinan 2021, maibe tanba pandemia COVID-19 interrompe tiha konstrusaun obra refere, nunee projesaun ba finalizasaun no inagurasaun estende fali ba iha fulan Abril tinan 2022.

Projetu portu Baia Tibar nee kaer hosi Empreza Xineza, China Harbour, nuudar Mega projetu dahuluk ho Parseria Publiku Privada (PPP) entre Governu Timor-Leste ho Bollore Group (Timor-Port S.A.). Portu ho kais naruk 630 m, luan 15 m, patiu ba kontentor 27 h, iha kapasidade armazenamentu ba kontentor mil 20 no kapasidade anual bele too millaun ida, wainhira portu nee funsiona sei sai nuudar “State of the Art Port” ho ekipamentu modernu hodi garantia movimentu rapidu no efisiente iha karegamentu-deskaregamentu kontentor sira ba esportasaun-importasaun nian.

Portu foun nee mos sei akomoda ro ahi boot liu portu Dili no sei asegura kustu ba freight/karregamentu.*

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here