PM Timor Leste Akompana Prosesu Funeral Espoza Xefe Casa Civil liu husi Aplikasaun Zoom

DILI, STLNEWS.co – Eugenia Augusta Tatulese, espoza Xefe Casa Civil Prezidente Republika Timor Leste, Francisco Maria de Vasconcelos, finalidade ona nia moris iha mundu ho deskansa em paz iha nia fatin moris iha Illa (Pulau) Salebabu, Postu  Administrativu Lirung, Distritu Nusar (Kepulauan) Talaud, Sulawesi Norte (Indonezia).

Primeiru Ministru (PM) Taur Matan Ruak, husi nia rezidensia iha Farol, Dili, akompana prosesu serimonia funeral mate isin matebian, Eugenia Augusta Tatulese, neebe halao iha Illa Salebabu, Postu Administrativu Lirung, Distritu Talaud, Sulawesi Norte liu husi aplikasaun Zoom iha Sabadu (28/8/2021).

Espoza Casa Civil, Francisco Maria de Vasconcelos, hakotu nia iis iha nia moris fatin, Lirung, Kuarta (25/8/2021) tuku 23.24 WITA ou tuku 00.24 OTL.

Ester Manangkoda (Idade tinan 85) nuudar inan husi matebian Eugenia Augusta Tatulese, sai sasin matebian hokotu nia iis. Nuudar inan sente triste tebes, tanba nia lakon oan feto husi sira nia leet. Nunee mos, inan husi Casa Civil, Ana Maria Frenandes de Vasconcelos (Idade tinan 107), hasoru situasaun hanesan. Nia mos sente triste tanba nia oan Francisco Maria de Vasconcelos nia kaben husik ona mundu.

Xefe Casa Civil, Francisco Maria de Vasconcelos nuudar laen kaben husi matebian no Adi Vasconcelos Pinto reprezenta familia boot husi Timor Leste, neebe asiste direta prosesu funeral mate isin matebian, Eugenia Augusta Tatulese, sente triste tebes ho matan wen sulin. 

Serimonia funeral mate isin matebian, Eugenia Augusta Tatulese halao iha Igreja Imanuel Lirung, prezide husi Prezidente Sinodo GERMITA (Gereja Masehi Injil iha Talaud), DR. Rev. Arnold Apolos Abbas, M.Th.

Familia boot Xefe Casa Civil iha Timor Leste, akompana serimonia nee liu husi online iha reszidensia Xefe Casa Civil, Francisco Maria de Vasconcelos, Aldeia 5 Outubru, Suku Bairo Pite, Postu Administrativu Dom Aleixo, Munisipiu Dili.

Prosesu funeral mate isin matebian, Eugenia Augusta Tatulese, hahu ho serimonia entregamente mate isin husi familia neebe reprezenta husi E. Gumansalangi, S.Ikom ba governu, igreja no kultura neebe reprezenta husi Xefe Sarani Igreja Imanuel Lirung, M.L. Bawonse, S.Th.

Hafoin serimonia entregamente mate isin hosi familia ba governu, igreja no kultura nian, Adi Vasconcelos Pinto neebe asiste diretamente prosesu funeral nee, lee biografia matebian Eugenia Augusta Tatulese.

Entretantu, Xefe Sarani Igreja Hosana Dili, Rev. Moises A. da Silva haklaken matebian nia dedikasaun durante tinan 20 nia laran sai nuudar bibi atan iha Sinodo Igreja Protestante iha Timor Lorosa’e (IPTL).

Nia esplika katak matebian sai nuudar pastora iha Abril 1999. Nia halao knaar nuudar pastora hodi halao atendimentu ba sarani sira iha Igreja Ekaristi Comoro, Dili. “Durante halao knaar nuudar pastora, matebian hatudu dedikasaun neebe diak tebes. Maske hasoru problema oin – oin, maibe matebian rezolve problema sira nee ho domin Maromak nian. Buat neebe ita presiza aprende no sai inspirasaun i motivasaun ba ita mak dedikasaun neebe matebian hatudu hodi atende ba sarani sira ho Kristu nia domin. Nunee, problema oin – oin neebe sarani sira hasoru bele rezolve ho diak,” tenik Rev. Moises A. da Silva. 

Prezidente Sinodo IPTL, Rev. Domingos Alves, S.Si.Teol, liu husi nia diskursu hatete, lori familia boot IPTL hato’o agradese wain ba Prezidente Sinodo GERMITA, DR. Rev. Arnold Apolos Abbas, M.Th, neebe lidera prosesu tomak Rev. Eugenia Augusta Tatulese nia mate to’o halot mate isin matebian iha nia fatin moris. 

Ba familia boot rua husi Lirung-Talaud no Timor Leste, Rev. Domingos Alves hateten katak situasaun tristeza hafalun hela familia boot rua, tanba lakon ona sarani diak ida husi familia rua nia leet. Nuudar ema fiar nain ba Maromak, ema mate laos rohan husi moris, maibe ema mate hanesan inisiu husi moris rohan laek iha lalehan.

Asistente II Administrador Distritu Nusar Talaud, Sulawesi Norte, Ir. Leida Dahlan, M.Si, reprezenta Administrador Distritu Nusar Talaud, dr. Elly Engelbert Lasut, ME, hatete katak mate no moris iha Maromak nia liman. Tanba nee, nia husu ba familia boot husi Lirung no Timor Leste, atu reza no husu bensa husi Maromak, atu nunee familia neebe matebian husik ona hetan korajen nafatin hodi simu realidade ida nee.

Familia Casa Sivil, Francisco Maria de Vasconcelos nian neebe reprezenta husi Abrao de Vasconcelos (Atual Prezidente Banku Central Timor Leste) iha biban nee hato’o agradese wain ba familia boot matebian Eugenia Augusta Tatulese iha Lirung no sira hotu neebe fo ninia apoiu moral no solidaridade ba familia boot rua neebe hasoru situasaun tristeza ida nee. 

“Familia boot Casa Civil, Francisco Maria de Vasconcelos, sente triste tebes no laran kanek, tanba ema neebe ami hadomi lakon ona husi ami nia leet. Hau lori familia boot Francisco Maria de Vasconcelos nia naran hato’o agradese wain ba ita hotu nia apoiu no solidariedade ba situsaun tristeza neebe familia boot husi Lirung no Timor Leste hasoru,” dehan nia.

Prosesu funeral mate isin matebian, Eugenia Augusta Tatulese, halao Lirung, Sabadu, iha  oras  13:00 WITA ou oras 14.00 OTL, neebe transmite liu husi Zoom no akompana direita familia boot Francisco Maria de Vasconcelos iha Timor Leste. Matebian Rev. Eugenie Augusta Tatulese, moris iha Lirung, 25 Agostu 1970. Nia simu ordenasaun sai nuudar pastora ho tinan 29. Depois simu ordenasaun, nia halao knaar iha Igreja Ekaristi Comoro, Dili, husi tinan 1999 to’o 2004. Husik tiha kargu nee, nia sai nuudar pastora part time hodi fo atendimentu ba sarani sira to’o nia husik mundu hodi fila hikas ba Aman Maromak Nia Kadunan Santu.

Ikus liu iha biban nee mos, Xefe Casa Sivil, Francisco Maria de Vasconcelos, nuudar laen kaben husi matebian, Eugenie Augusta Tatulese, hato’o agradese wain ba familia boot husi Lirung no Timor Leste, neebe fo apoiu moral no solidariedade ba situsaun tristeza neebe nia hasoru.*

Reportajen: Yulius Ora/Mikael M. Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL Setembru: Kazu Pozitivu 32 & Rekuperadu 83

DILI, STLNEWS.co - Sentru Integradu Jestaun Krize (SIJK) ohin relata kazu pozitivu iha ema nain 32 no rekuperadu hamutuk 117. "Kazu detetadu foun neebe relata ohin loron...

MTKI Loke Kompetisaun Pintura

DILI, STLNEWS.co - Ministeriu Turizmu Komersiu no Industria (MTKI), liu husi Diresaun Nasional Emprendismo ba Atividade Produtus Turistiku organiza kompetisaun pintura ba joven sira. Grupu...

Remata Nia Misaun Iha TL, Sitorus Despedida Ho WNI

DILI, STLNEWS.co – Embaixador Indonezia ba Timor Leste (TL), Sahat Sitorus ho nia espoza Bintang Vera C. Sitanggang, neebe durante tinan 4 ho balun...
%d bloggers like this: