DILI, STLNEWS.co – Deputadu sira iha Parlamentu Nasional (PN) aprova ona proposta orsamentu retifikativu ho montante billaun US$ 1 resin, ho votus afavor 36, kontra 22, abstensaun 5.
Liu husi sesaun plenaria, Kuarta nee (11/05/2022) iha diskusaun ba faze espesialidade ba loron daruak, wainhira halao diskusaun ba proposta alterasaun sira no remata la iha intervensaun, tanba nee Prezidente Parlamentu Nasional (PPN), Aniceto Guterres submete ba votasaun, liu husi votasaun direta deputadu sira aprova ona proposta orsamentu retifikatvu ba tinan 2022.
Tuir Prezidente Parlamentu Nasional, Aniceto Guterres katak, rezultadu votasaun afavor 36, kontra 22, abstensaun 5, proposta lei numeru 38/v (4a) sobre primeira alterasaun lei numeru 1/2022, dia 3 de janeiru, Orsamentu Jeral Estadu (OJE) 2022 seguda alterasaun lei numeru 8/2008, 30 de Junu, lei tributaria no kriasaun fundu ba kombatente libertasaun nasional aprova iha final global,” anunsia PPN Aniceto Guterres, Wainhira remata votasaun final global ba propsota orsamentu retifikativu.
Prezidente ParlamentuNasional, Aniceto mos kongratula VIII Governu Konstitusional.
Enkuantu oras nee daudaun bankada parlamentar sira sei halao hela deklarasaun bankada, konaba proposta orsamentu retifikativu.
Entertantu tuir dadus neebe mak STL asesu, orsamentu retifikativu neebe mak governu submete ba iha parlamentu ho montante billiaun US$ 1,1 no osrsamntu nee sei uza hodi finansia medidas komplementar hamutuk 13, ho nia detalha hanesan tuir-mai nee: I) Kriasaun fundu veteranu ho orsamentu alokadu billiaun US$ 1; II) Atribuisaun pagamentu desimu terseiru US$ 200 ba kada família (exeptu funsionariu publiku sira) ho orsamentu alokadu millaun US$ 70; III) Uma kbiit laek plus ho orsamentu alokadu millaun US$ 25; IV) Bolsa Estudu ba melhór graduadu estudante ensinu báziku no sekundariu ho orsamentu alokadu millaun US$ 7,5; V) Programa mão de obra ba postu administrativu, millaun US$ 7,2; VI) Revitaliza kafe no subsidiu ba kafe Laku-teen ho orsamentu alokadu millaun US$ 6,4; VII) Pagamentu ba diferensa remunerasaun PNTL nian ho rejime salarial foun, ba membru PNTL 4.096 ho orsamentu alokadu millaun US$ 5,1; VIII) Harii sede arte marsial no rituál millaun US$ 2,5; IX) Programa Eskola iha uma ho orsamentu alokadu millaun US$ 2,1; X) Internet gratuita iha eskola sira, millaun US$ 1,1; XI) Subsídiu akomodasaun ba PNTL no F-FDTL ho orsamentu alokadu millaun US$ 1,9; XII) Estabelesimentu sekretaria ba asuntu traballador esterior no komunidade timoroan iha diáspora US$ 500 mil; XIII) Empregu ba mellór alunu universitariu sira US$ 437,5 mil.
(gui)
