PN Autoriza Governu Renova EE Ba 12

Membru Parlamentu Nasional autoriza governu renova Estadu Emerjensia (EE) ba da-12 iha teritoriu Timor Leste, tuir pedidu Prezidente Republika, Francisco Guterres Lú Olo. (Foto: Media PN)

DILI, STLNEWS.co – Membru Parlamentu Nasional autoriza governu renova Estadu Emerjensia (EE) ba da-12 iha teritoriu Timor Leste, tuir pedidu Prezidente Republika, Francisco Guterres Lú Olo.

Liu husi sesaun plenária Kuarta (31/03/2021) iha PN, hafoin halao debate entre Governu ho PN, no liu husi votasaun nominal deputadu sira renova ona EE ba dala 12, no EE nee validu iha dia 3 Abril ate dia 2 de Maiu 2021.

Prezidente Parlamentu Nasional (PPN), Aniceto Guterres hatete, rezultadu votasaun afavor 49, kontra 0, abstensaun 14, ho nunee pedidu renova Estadu Emerjensia ba dala 12 aprovadu.

“Nuudar observasaun ikus meza kaer ba liafuan rekomendasaun Klamar fuik katak, unidas da nação vencemos, tanba nee komvida ita hotu mai hamutuk ho governu atu hakotu dezafiu boot kontrolu Covid-19, no kontrola no salva Timor oan atu labele mate tanba Covid-19 nomos labele mate tanba hamlaha,” anunsiu PPN.

Entretantu Iha deklarasaun ikus, Xefe Bankada PD, Antonio da Conceição hatete, ohin dala ida tan Governu aprezenta hikas proposta PR nian konaba EE atu Parlamentu Nasional fo aprovasaun. Pedidu ida nee halo ba dala 12 ba krize pandemia neebe mak mundu tomak hasoru hela no Timor-Leste mos hasoru hela dadaun.

Nia deklara, pandemia Covid-19 neebe afeta mundu alerta kedas ona Timor-Leste bainhira ita hahu deklara Estado de Emerjencia. No bainhira hahu deklara EE mos, hahu sente efeitus ka kauza husi aplikasaun EE nee rasik ba atividades de dezenvolvimentu pais nian, liu-liu atividades de dezenvolvimentu ekonomiku.

Iha estensaun EE ba dala 12 nee mos, husu atu Governu hahu sériu buka aimoruk vasina hodi vasina povu hotu atu fo imunidade no kapasidade rezistênsia ba moras nee karik sei iha tan ataka neebe mak todan liu.

Aleinde nee Deputadu Bankada KHUNTO, Antonio Verdial hatete, vota afavor, maibe husu Governu implementa edukasaun online nunee estudante sira kontinua sira nia estudu.*

Reportajen: Guilhermina Franco/Domingas Soares
Editora: Carme Ximenes

LEAVE A REPLY

Please enter your comment!
Please enter your name here