DILI, STLNEWS.co – Parlamentu Nasional ezije ba governu atu halo lalais pagamentu ba jornalista lina frente, neebe too agora seidauk hetan direitu.
Kestaun nee hatoo husi Visi Prezidente Parlamentu Nasional, Deputadu Luis Roberto ba jornalista iha Parlamentu Nasional, Tersa nee (26/04/2022).
“Pagamentu ba iha media sira, iha parlamentu nee ezije beibeik ba governu atu halo pagamentu ba ita nia jornalista iha media sira hotu, tanba sira nudar mos primeiru lina, tanba nee mak parlamentu husu beibeik i preve mos orsamentu iha neeba, maibe ate agora seidauk halo pagamentu ba media sira,” dehan deputadu nee.
Nia dehan, nudar reprezentante povu iha Parlamentu Nasional ezije nafatin ba governu, oinsa bele selu lalais jornalista sira no mos entidades sira neebe tama iha lina frente, tanba orsamentu preve hotu ona no governu ezekuta deit.
Nunee mos Deputada Fernanda Lay hatete, lina frente mos dehan simu rapel, maibe rapel wainhira mak simu, nia la hatene jornalista sira simu ona ka lae, la hatene nee sai konfuzaun, tanba nee nia husu governu iha sensiblizasaun fo osan ba ema sira neebe halo tiha ona servisu ou presta ona sira nia servisu.
Hatan ba kestaun nee, Ministru Assuntu Parlamentar no Komunikasaun Sosial (MAPKOMS), Francisco Jeronimo hateten, problema tekniku dala barak ulun moras oituan, tanba orsida iha Ministeriu Finansas dehan, ida nee labele, mas lei dala ruma fo dalan, mas Ministeriu Finansas dehan labele, haruka halo pareser.
(eme)
