PN Kondena Makas Kazu Lahane; Armas Estadu Laos Defende Feen – Oan

DILI, STLNEWS.co – Relasiona ho kazu omesidu Lahane, oknum polisia ida uza armas estadu tiru ema nain 2 mate no ida kanek, Parlamentu Nasional (PN) kondena makas, tanba kaer armas estadu laos atu defende feen ho oan hodi oho ema seluk.

Preokupasaun nee hatoo husi Primeira Vice PN, Maria Angelina Sarmento katak, PN kondena makas aktu husi membru Polisia Nasional Timor Leste (PNTL) ida neebe komete krime intoleransia.

Kazu nee laos foin akontese, maibe akontese ba krime omesidu, bainhira membru PNTL balu uza armas no farda atu hodi rezolve problema privadu ida nee intoleravel. Karik problema entre membru nee nia oan mane ho matebian ho familia sei iha dalan atu rezolve, tuir lei sira neebe iha.

“Ami kondena makas aktus neebe komete husi membru PNTL ida iha Lahane, tanba simu sasan estadu armas ho farda nee laos uza hodi proteje feen ho oan, atu proteje o nia familia nee, laloos. Há não ser que ema ba ameasa sunu uma, ka atu baku no oho o nia feen-oan, laiha dalan seluk atu atua, mak foin uza asaun nee hodi proteje. Maibe ba buka ema iha uma nee ami laiha liafuan atu koalia, neebe PN kondena makas,” lamenta Vice PN, Angelina ba jornalista (07/06/2021) iha PN.

Nia dehan, tuir nia pontu de vista ho situasaun neebe akontese nee bei-beik ona, neebe atu fo hanoin katak iha opsaun 2 deit, primeiru reforma totalmente hirarkia lideransa PNTL, segundu halo reforma ba lejislasaun sira, koalia kona ba PNTL nian. Tanba talves lejislasaun sira neebe la relevante ona ho situasaun ohin loron.

Nia hatete, desizaun atu membru PNTL sira lori armas ba uma mos dalaruma larelevante ona karik. Tanba situasaun nee akontese bei-beik ona, i PN mos koalia bei-beik, too sira mak laiha liafuan deit.

Laos nee deit maibe vice PN nee mos, rekomenda katak formasaun ba PNTL sira presiza halo formasaun direitus umanus ba lori tempu neebe naruk oituan, atu ema bele hatene oinsa hatuur no respeita dignidade umanu. Segundu presiza halo formasaun ba konsementu psikolojiku, neebe polisia tenke hatene oinsa atu halo atuasaun ba ema neebe iha problema.

Nia haktuir, ema halo problema, mai ho karakter nee violentu agresivu, maibe polisia hanesan instituisaun fo protesaun ba sidadaun sira mak ba atua situasaun ho violentu nee larezolve problema. Tanba nee formasaun psikolojiku nee importante hodi fo konesementu ba sira, atu hatene kona ba halo atuasaun ba problema ruma. Se ema mai ho linguajen agresivu no violentu entaun polisia tenke muda karater hodi responde ba ema nee.

Labele tanba kaer ona armas no uza farda, haree ba komunidade nee liman mamuk, mai ho agresivu no violentu, ida be atu ba atuasaun problema nee responde ho violensia nee labele.

Nia fo ezemplu, haree polisia sira iha Australia ho America bainhira ba halo atua situasaun mak ema mai ho karater agresivu no violentu, polisia sira nee iha aprosimasaun presosivu, bainhira iha sitausaun ameasadu ba sira, entaun sira fo uluk sinal tiru sae ba leten laos tiru ema hodi oho ema.

Lejisladora nee lamenta kazu Lahane nee, membru polisia nee laprofisional, tanba tuir informasaun neebe iha katak, membru polisia nee ba halo buska ema nia uma iha oras deskansa i ba laos uza farda, i antes nee nia oan mane mos iha problema ho joven sira iha bairu nee.

Ho sujestaun atu reforma lejislasaun PNTL nian nee, relasiona ho situasaun ikus-ikus nee akontese bei-beik, ida nee presiza haree lejislasaun ida mai rigorozu ba indisiplinar .

Nunee mos Deputadu Partidu Demokratiku (PD), Mariano Assanami Sabiono hatete, presiza halo jestaun ba psikolojiku ba PNTL ho FDTL, tanba selae psikolojikamente ema balu ho psikolojia estres hela, ho sira nia problema privadu, tanba nee mak jestaun iha instituisaun seguransa presiza governu tau atensaun.

Tanba nee, tuir Assanami, presiza governu atu atensaun maximu hodi fasilita diak liu tan sira. Tanba polisia iha fatin barak nee ladun fo atensaun diak, tanba nee presiza fo atensaun hodi hadia buat sira nee.

Entretantu Prezidente Komisaun A trata lejislasaun no Justisa, Joaquim dos Santos hatete, haree ba aktus sira nee, laos lei laforte, maibe nee indisiplinadu pesoal depois de mal jestaun ka autu kontrolu organizasional nee fraku. Kualker lei neebe mak halo sempre seguru, desde bele implementa nee diak, maibe afeitus implementasaun nee mak mosu indisiplina.

Nia preokupa, membru polisia indisiplina nee kauza prinsipal mak nia iha problema psikolojiku, problema nee mai husi nia backround moris lor-loron lakonsegue rezolve, i lori problema nee tama too instituisaun nian. Atu nia halo sala asaun hodi foti desizaun oho ema. Neebe hahalok nee krime tanba nia hatene katak lei bandu maibe nia hakarak halo, neebe tenke prosesa tuir lei.

Karik lei iha instituisaun PNTL larelevante ona ho situasaun sira nee entaun halo proposta lei ida mai iha PN hodi hadia fali. Regras tenke iha sansaun disiplinar i sansaun juridiku, disiplinar nee bazeia ba regras internal PNTL nian, prosesu kriminal ba hatan iha tribunal ba kadeia.*

Reportajen: Guilhermina Franco/Madalena Horta
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun; EP2

STLNEWS.co – Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun • EPISODE 2: Drama Stop Bullying https://youtu.be/GDfSwKsB-gQ • Mental Health https://youtu.be/Ow3-hgXPryE Ministério dos Assuntos Parlamentares...

Harii Federasaun Tenke Prepara Kondisaun

DILI, STLNEWS.co - Sekretariu Estadu Juventude No Desportu (SEJD), hatete harii federasaun tenke prepara mos kondisaun hanesan tenke iha atleta no treinador rasik. Lia hirak...

SEJD Enkontru Ho Lider Artemarsiais

DILI, STLNEWS.co - Sekretariu Estadu Juventude no Desportu (SEJD), halao enkontru ho lider artemarsiais sira iha Timor Leste, kona ba rekezitus artemarsiais nian neebe...
%d bloggers like this: