PN Konsidera MEJD Halo Diskriminasaun Ba Funsionariu

Vise Prezidente Parlamentu Nasional, Luis Roberto. (Dok: STL)

DILI, STLNEWS.co – Reprezentante povu iha uma fukun Parlamentu Nasional, konsidera Ministeiru Edukasaun, Juventude, no Desportu (MEJD), halo diskriminasaun ba funsionariu Timoroan nain 93 neebe konkursu publiku iha tinan 2019, tanba too agora seidauk asina kontratu.

Preokupasaun nee hatoo husi Deputadu Bankada KHUNTO Luis Roberto katak, sente duvidas konaba funsionariu nain 93 neebe iha 2019, sira tuir konkursu publiku iha ex Ministra Dulcia nia tempu halo rekrutamentu ema nain 93 maka pasa.

“Maibe too agora seidauk asina kontratu no Ministru MEJD rasik fo sai ba publiku katak, sira nain 93 iregularidade. Hau nuudar ema joven ida kuandu rona lia-fuan iregularidade husi Ministru nee ita bele dehan katak, hamosu diskriminasaun boot ida ba sidadaun Timoron sira neebe maka tuir konkursu refere,” dehan nia liu husi plenaria, iha PN, Tersa (16/02/2021).

Nia afirma, nuudar politiku iha orgaun ida nee, husu nafatin ba Ministru oinsa atu bele rezolve lalais problema hodi fo kontratu ba ema 93 neebe pasa ona atu asina.

“Ministeiru refere presiza rekruta ema labele rekruta tiha ikus mai ninia rezultadu hasai tiha, la fo fila fali ba sira atu asina kontratu ema hein too sira mai iha PN, hatoo sira nia petisaun oin-oin deit,” tenik nia.

Nia hatutan, tanba nee husu ba Ministru oinsa maka atu bele haree ba asuntu ida nee.

Iha fatin hanesan Deputadu Bankada PLP, Abel Pires, “hau preokupa teb-tebes ho funsionariu ajente administrasaun publika nain 93,” dehan nia.

Nia esplika, tanba prosesu rekrutamentu komisaun funsaun publika maka halao, lidera rasik husi Ministeiru Edukasaun hanesan Prezidente de juri selisaun hotu ona, no ema sira nee hetan ona rezultadu.

Nia hatutan, propriu Komisaun Funsaun Publiku fo rekomendasaun atu halo asina kontratu, maibe hapara fali prosesu nee.

“Hau hanoin ladun justu, no husu ba Ministru Edukasaun atu bele esplika konaba situasaun nee,” hakotu nia.

Reportajen: Domingas Soares/ Guilhermina Franco
Editora: Carme Ximenes

LEAVE A REPLY

Please enter your comment!
Please enter your name here