DILI, STLNEWS.co – Deputadu sira iha Parlamentu Nasional (PN) kontinua kestiona konaba roo Berlin Ramelau neebe soke, tanba kapitaun roo ladun iha esperiensia lori roo hodi estraga rikusoin Timor nian.
Preokupasaun nee hatoo husi Deputadu Bankada CNRT, Domingos Carvalho hatete, nia sei koalia nafatin ba buat neebe mak koalia beibeik ona konaba roo Berlin Ramelau, uluk hatete ona katak, kapitaun sira nee kuandu lori roo la hatene lalikan lori, hodi estraga roo nudar rikusoin Timor nian.
“Kapitaun roo Nakroma iha nee, tanba sa la husu kapitaun roo Nakroma lori ro nee, hodi hein too Nakroma diak, maibe tenki obriga aan, hodi lori fali kapitaun seluk lori roo nee, hodi estraga ita nia sasan Timor nian ka Timor nia rikusoin, tanba roo nee laos partidu ka ema ida nian,” kestiona Deputadu Domingos Carvalho iha PN, liu husi sesaun plenaria, Segunda nee (25/04/2022).
Nia dehan, roo Nakroma kuaze tinan 15 ona seidauk soke, maibe roo Berlin Ramelau foin fulan 5 soke beibeik, nia koalia tanba hola parte iha komisaun E trata asuntu infraestrutura, i ida nee Timor nia rikusoin, enves opozisaun koalia kolega sira seluk apoia hodi hadia lae, maibe mai ataka fali.
Nia lamenta, haree ba roo nee kuak tiha mos la iha ema ida mak kestiona, maibe sira nudar opozisaun koalia tanba rikusoin Timor nian, hakarak salva povu nia vida, maibe koalia nee dehan sala fali.
Hatan ba kestaun nee, Sekretariu Estadu Komunikasaun Sosial (Sekoms), Mericio Akara hatete, konaba kestaun roo nee atu responde so ministeriu relevante, mak Ministeriu Transporte No Komunikasaun (MTK).
(gui/dom)
