PN Propoin Governu Autoriza Loke Loja Eletronik

(Foto: STL/Guilhermina Franco)

DILI, STLNEWS.co – Parlamentu Nasional propoin ba governu atu loke loja elektronik no loja neebe faan material konstrusaun, atu nunee fasilita ema hodi halo manutensaun ba sasan eletronika sira neebe aat.

Deputadu Adriano do Nascimento hatete, eletrisidade iha Timor Leste bainhira udan bosok deit mate lakan ona, ida nee fo impaktu ba sasan elektronik balun aat no atu ba sosa lampu oan sira nee, maibe labele tanba loja taka.

“Hau hatoo proposta ba governu atu autoriza loke loja eletronik no loja faan material, tanba ema balun ahi nakukun impaktu husi ahi mate lakan, halo lampu kotu, no balun uma anin loke sai tiha no atu taka fali kalen nee mos presiza peregu i balun atu troka kalen ladiak tanba loja neebe faan material konstrusaun taka, tan nee propoin ba governu atu loke loja sira nee, semana ida dala ida,” dehan Deputadu Adriano do Nascimento iha Parlamentu Nasional.

Nia afirma, governu tenke fo espasu hodi loke loja elektronik atu nunee fasilita povu kiik sira neebe presiza atu sosa netik kalen ruma, ou lampu ruma, ou alat halo manutensaun ba AC ou jelera ruma, tanba ho situsaun Covid halo ema hakmatek iha uma, maibe atu halo netik atividade ruma mos ladiak, tanba loja taka.

Iha fatin hanesan Deputadu Domingos de Carvalho hatutan, serka sanitaria halo povu sulan deit iha uma, sira atu halo atividade ruma mos ladiak tanba loja sira neebe faan material konstrusaun iha kapital Dili taka hotu kedas.*

Reportajen: Madalena Horta/Guihermina Franco
Editor: Ekipa STL

LEAVE A REPLY

Please enter your comment!
Please enter your name here