PNTL Apoiu Seguransa Ba Vitima Afetadu Inundasaun

Segundu Komandante Polisia Nasional Timor-Leste (PNTL), Munisipiu Dili Superintendente Polisia Euclides Belo. (Foto: STL/Claudios de Jesus)

DILI, STLNEWS.co – Komandu Polisia Nasional Timor Leste (PNTL) Munisipiu Dili, koloka ona pesoal seguransa ba kada fatin neebe vitima afetadu inundasaun sira hela ba, nunee bele asegura seguransa ho diak iha tempu loron no kalan.

Dehan Segundu Komandante Polisia Nasional Timor-Leste Munisipiu Dili, Superintendente Polisia Euclides Belo ba jornalista sira, iha nia knaar fatin Caikoli Dili, Kuarta (07/04/2021).

Nia dehan, komandu PNTL munisipiu Dili garante seguransa tatika ba maluk sira neebe hela iha karantina, izolamentu, inklui mos koloka pesoal sira hodi garante seguransa ba sidadaun sira neebe uma afetadu ba udan been ho tahu.

“Hanesan iha edifisiu Ministeriu Finansa nian iha Aitarak laran, nomos iha CVTL, Liseu UNTL nian, Don Bosco, Infordepe, nunee mos iha Joao Paulo II leten no kraik, nunee mos iha eskola Primaria Camea, eskola Santa Terezinha Becora, Hera madre sira nia, tanba fatin sira neebe mak hau temi nee seguru ba sidadaun sira atu bele aguenta netik,” dehan nia.

Euclides hatutan, kada fatin ida koloka pesoal nain 2 to nain 5, tuir total komunidade sira neebe ba okupa fatin sira hanesan iha Don Bosco numeru 1 kedas, tanba nee loron kalan tenke koloka nain 3 ou nain rua nunee bele garante seguransa ho diak iha fatin refere.

“Iha edifisiu Ministeriu Finansa nian kalan ita koloka nain tolu no loron ita koloka nain rua nunee bele garante mos seguransa, inklui mos fatin seluk ita nafatin koloka pesoal sira atu nafatin garante ita nia komunidade sira nunee bele seguru iha neeba,” dehan nia.*

Reportajen: Efizenia da Costa/ Claudios de Jesus
Editor: Ekipa STL

LEAVE A REPLY

Please enter your comment!
Please enter your name here