PNTL Husi Munisipiu Prepara Planu

Polisia Nasional Timor Leste (PNTL), realiza enkontru ho komandante polisia munisipiu, hodi prepara sira nia planu, neebe sei haree liu ba iha asuntu polisiamentu komunitariu. (Foto: STL/Claudios de Jesus)

DILI, STLNEWS.co – Polisia Nasional Timor Leste (PNTL), realiza enkontru ho komandante polisia munisipiu, hodi prepara sira nia planu, neebe sei haree liu ba iha asuntu polisiamentu komunitariu.

Komandante Jeral do PNTL, Komisario Polisia Faustino da Costa hatete, enkontru nee hanesan kontinuasaun de enkontru hodi haree ba oinsa maka komandante sira husi munisipiu ida-idak prepara sira nia planu.

“Ohin ita mai iha nee atu formaliza regras ida, internamente PNTL tau naran Normas Organizasaun no Prosedimentu (NOP), hahu husi oinsa mak identifika problema iha ida-idak nia munisipiu.” hateten nia ba jornalista bainhira partisipa iha enkontru konaba Prosedimentu Planu Asaun Polisiamentu Komunitariu ba Parte Munisipiu no Rejional (PAPKMR), iha salaun Tower Fatuhada, Segunda, (22/02/2021).

Komandante Jeral Polisia nee hateten, haree ba iha koloka prioridade, tanba nee komandante sira sei aprova no mos sei hatoo mai iha nasional. No nasional mos sei haree ida neebe maka sai prioridade nomos ba PNTL tomak, sei aprova tiha maka sei distribui fali ba iha komandante sira atu bele halo implementasaun.

Nia informa, durante nee sira halo avaliasaun ba servisu husi parte Konsellu Seguransa Munisipiu (KSM) nian, ba implementasaun de servisu lao hela, no KSM rasik iha ona 12 munisipiu inklui RAEOA rasik.

Nia relata tan, haree ba iha parte Konsellu Polisiamentu Komunitario (KPK), oras nee dadaun hanesan mos parte neebe maka dezenvolve no mantein nafatin halao knar ou servisu ba atendementu iha suku nian kontinua lao hela.

“Husi 452 sukus, ho apoio mos husi parseiru ita estabelese ona, KPK, ba suku hamutuk 328, alende nee husi 452 suku nee ita koloka desde 2015, ita nia Ofisial Polisia de Suku.” dehan nia.

Iha Fatin hanesan Komandante Polisia Munisipiu Lautem, Superentendente Antonio R. Fernandes hateten, programa ba implementasaun Polisiamentu Komunitariu iha Munisipiu Lautem nian, operasaun husi Konsellu Polisia Komunitario (KPK), hahu ona iha Suku hamutuk 13.

Alende nee hetan mos apoiu husi parseiru sira, ho nunee espera katak iha fulan Marsu nia laran operasaun KPK, sei atinji 20 suku.

“Konsellu Siguransa Munisipiu (KSM), ita hahu fo tomada de pose iha Janeiru 2019, maibe dadauk nee ita nia administrador foun, tanba nee ami sei halo hela koordenasaun hodi bele termina tempu ida hodi halo enkontru konaba KSM nian,” tenik Antonio.

Nia salienta liutan, komunidade iha Munisipiu Lautem apresia tebes ho ejistensia KPK iha sira nia suku.

Reportajen: Claudios de Jesus/ Est.3/Est.5
Editor: Domingas Gomes

LEAVE A REPLY

Please enter your comment!
Please enter your name here