PNTL Kaer Estudante, AUTL Lamenta

Aliansa Universitariu Timor Leste (AUTL), lamenta tebes ho atuasaun membru Polisia Nasional Timor Leste (PNTL) neebe uza sira nia forsa hodi kaer estudante sira. (Photo: STL News/Crisogono Magalhães)

DILI, STLNEWS co – Aliansa Universitariu Timor Leste (AUTL), lamenta tebes ho atuasaun membru Polisia Nasional Timor Leste (PNTL) neebe uza sira nia forsa hodi kaer estudante sira.

Kestaun nee hatoo husi reprezentante AUTL, Nilton Dodi Jeronimo Cabral, ba STL, iha edefisiu Kampus UNTL, Liceu, Dili (11/09/2020).

“Akontesementu ohin dader, neebe membru PNTL mai kaptura ami nia maluk estudante neebe ezije ba Ministeriu Ensinu Superior Siensia no Kultura (MESSK), hodi husu atu halo tratamentu subsidiu neebe igual, no labele hamosu diskriminasaun, maibe realidade membru PNTL uza sira nia forsa hodi mai kaer deit estudante,” dehan Nilton.

Nia dehan, tuir lolos nee, membru PNTL sira labele halo hanesan nee, tanba asaun neebe estudante AUTL halo nee ezije buat los, laos halo krimi, tanba nee, AUTL lamenta tebes ho membru PNTL nia atuasaun nee.

“Konaba atusaun membru PNTL nian neebe la tuir prosedementu, AUTL sei hatoo karta ida ba iha PDHJ hodi akompana prosesu nee, iha atuasaun membru PNTL nian iha violasaun direitu humanus ga lae,” katak Nilton.

Nia haktuir, Membru AUTL neebe maka kaptura ona husi parte membru PNTL iha loron primeiru 15 no kaer tan nain 17, nunee total husi membru PNTL kaer hamutuk 32.

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here