PNTL La Autoriza Movimentu Transporte Munisipiu Ba-Mai Dili

Segundu Komandante Polisia Nasiona Timor-Leste (PNTL) Munisipiu Dili, Superintendente Polisia Euclides Belo. (Foto: STL/Efizenia da Costa)

DILI, STLNEWS.co – Polisia Nasional Timor Leste (PNTL) la autoriza transporte, sira neebe halo movimentu tama no sai kada munisipiu ba mai Dili, durante lockdown semana ida.

Segundu Komandante Polisia Nasiona Timor-Leste (PNTL), munisipiu Dili Superintendente Polisia Euclides Belo hatete, komandu PNTL munisipiu Dili kumpri rezolusaun neebe maka iha, no kumpri pontualmente hodikalan maizumenus oras 12:00 kalan, hodi taka purtaun entrada tama no sai, iha pontu haat ou lima iha entrada Dili.

“Ita aplika fali iha Metinaro so autoriza deit transporte nesesariu iha parte leste nian tama mai Dili, no transporte husi Dili neebe maka atu sai nee ita taka totalmente husi Dili, atu sai ba munisipiu parte leste nian ita taka totalmente, inklui mos kareta transporte husi kapital Dili atu parte oeste nian ka parte rai klaran nian hanesan Aileu, Ainaro transporte husi Dili la sai no husi munisipiu mos latama,” dehan nia ba jornalista sira, iha nia knaar fatin Caicoli, Dili, Tersa (09/03/2021).

Nia hatete, exeptu ba ajentes seguransa defesa, mediku, nomos kompania sira neebe maka fornese ai-han ba seguransa sira no diresaun sira neebe maka hetan autorizasaun formal husi Ministeriu Interior, ida nee maka autoriza atu sira bele sai ba servisu no fila fali mai.

“Exemplu dadaduk nee mediku balun hela iha Dili mais servisu iha Likisa, entaun agora dadauk sira iha ona lista neebe mak husi diresaun mediku nian, hatoo ba komandu nunee bele fasilita sira ba mai,” dehan nia.

Nia hatutan, dadersan husi Dili ba servisu iha Likisa no loraik bele fila fali mai, ida nee autoriza, mais sira neebe maka atu ba vizita familia ka ba halo lia, ou halo aktividades seluk neebe la nesesariu nee PNTL sei la autoriza.

Ida nee maka PNTL halo ona, no sidadaun barak mak komprimenta ona espera katak sidadaun sira iha Dili mos bele kumprimenta ida nee.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here