PNTL Preparadu Asegura 28 Novembru

Komandante Jeral Polísia Nasional Timor Leste (PNTL) Komisariu Faustino da Costa. (Dok. STL)

DILI, STLNEWS.co – Komandante Jeral Polísia Nasional Timor Leste (PNTL), Komisariu Faustino da Costa hatete PNTL preparadu asegura 28 novembru loron proklamasaun indepedensia ba dala 45 neebe mak realiza iha munisipiu Likisa.

Komandante Jeral Polisia Nasional Timor Leste (PNTL) Komisariu Faustino da Costa hatoo kestaun nee bainhira remata hasoru malu ho prezidente republika iha palasiu Prezidente, Bairru Pite, Kinta (26/11/2020).

“Preparasaun 28 Novembru nee ita envolve forsa masimu tantu ba iha parada hanesan mos halo seguransa tanba laos deit iha nivel nasional neebe halao iha Munisipiu Likisa, maibe kuaze munisipiu hotu-hotu mos sei selebra ida nee,” informa Faustino.

Komjer hatete akompana kuaze munisipiu hotu-hotu mos loke feira hahu kedan semana kotuk neebe polísia asegura ida nee.

Iha biban nee Polísia Nasional Timor Leste hatete sira mos koordena hela ho ministeriu relevante atu hare ema faan no tiru fugetes sira.

“Ema faan no tiru fugetes nee faze koordenasaun hela ho ministeriu relevante oinsa ba oin atu haree, maibe tatikamente Polísia Nasional Timor Leste halo saida ba sira neebe halo importasaun ilegal ba fugetes sira nee atu prosesu ba Ministériu Públiku,” dehan Komandante PNTL.

Iha biban nee Komandante Jeral Polisia Nasional Timor Leste (PNTL) Komisariu Faustino da Costa mos hatutan sira mos ezekuta mandatu tribunal Borgol Prezidente ANC João Olivio Freitas.

“Kapturasaun ba Prezidente Autoridade Nasional Komunikasaun (ANC) nee atu dehan deit laos Komandu maka orienta, Komandu PNTL ezekuta mandadu neebe mai husi Tribunal,” dehan Faustino*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here