PNTL Tenke Sai Ezemplu Diak Iha Sosiedade

DILI, STLNEWS.co – Prezidente Republika Francisco Guterres Lú Olo hatete ajente polisia nee laos ema babain, maibe ema kualifikadu tanba nee mak tenke ho ulun malirin hodi simu kritika hotu bo sai ezemplu diak iha sosiedade.

Prezidente Republika Francisco Guterres Lú Olo hatoo kestaun nee liu husi mensajen hosi iha okaziaun Serimonia Aniversariu Polísia Nasional Timor-Leste ba dala 21 iha Palasiu Prezidensial Nicolau Lobato, Sabado (27/03/2021).

“Ajente polisia laos sidadaun baibain, maibe sidadaun kualifikadu ida, no nunee nia tenke tau matan ba orden publiku, tenke iha konsiensia katak ninia knaar sosial importante tebes, hatene simu ho ulun malirin kritika saida deit hosi sidadadun sira, no sai ezemplu diak ba sosiedade nuudar sidadaun neebe kumpre mos lei no regras no nunee bele mos defende dignidade PNTL nian.” dehan PR.

PR dehan bainhira fiskaliza kumprimentu medidas prevensaun hosi governu, tenke haktuir prinsipius estadu direitu nian iha kontestu emerjensia nian, ho maneira ida neebe hanorin, informa no orienta povu, no uza deit forsa bainhira presiza duni maibe tuir situasaun ida-idak ezije no natoon deit hodi kontrola kedas.

“Haree ba knaar neebe profisional sira seguransa publiku nian halao iha lina oin, importante tebes katak imi iha mos kondisaun servisu diak hodi hamenus risku infesaun. Ida-nee ezije halo mudansa ba imi nia rutina servisu, tenke uza hodi biit ekipamentu protesaun pessoal, foti medidas seguransa no prepara material ba orientasaun.” dehan nia.

Pandemia Covid-19 neebe Timor-Leste mos hasoru dadaun muda ona ema nia moris iha sosiedade.

“Derepente deit ita nia moris baibain muda, no ita bele haree momoos katak ita na instituisaun no servisu balun, liu liu iha area saude no seguransa interna seidauk bele hatan diak no lalais ba nesesidade ohin loron nian. Situasaun ida nee halo ita preokupa liu konaba itania futuru.” dehan nia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here