PNTL Trava Deputadu Tama Bobonaro

Deputada Bankada CNRT, Maria Barreto. (Foto: Espesial)

DILI, STLNEWS.co – Membru deputadu husi komisaun B, trata asuntu Negosiu Estranjeiru, Defeza no Seguransa, halao dezlokasaun Dili ba Ermera hodi rezolve problema komunidade, maibe viola regras Estadu Emerjensia (EE), tanba fila liu husi dalan Bobonaro, neebe estabelese hela lockdown.

Kestaun nee hatoo husi Deputada Bankada CNRT, Maria Barreto katak, nia apresiasaun no kongratula ba komandante PNTL iha Munisipiu Bobonaro, Postu Administrativu no suku, neebe mak firme iha ordem, lockdown nian i konsege trava viazem membru deputadu balu neebe mak tama husi Atsabe hakat ba Bobonaro, maibe too iha iha dalan sira fila.

“Hau apresia ba servisu nee, talves trata ema hotu hanesan, labele membru Governu ka deputadu sira tanba deit lockdown husik liu, depois povu bain-bain tenke trava,” katak Deputada nee iha nia intervensaun bainhira debate estende EE ba dala 11 iha PN Segunda (01/03/2021).

Lejisladora nee husu, atu seguransa sira, kontinua firmi ba ordem neebe mak iha.

Hatan ba kestaun nee, Deputadu husi Bankada Khunto atual membru komisaun, Luis Roberto katak, kona ba viola regras EE, atu dehan, momentu neeba nia hamutuk ho deputadu komisaun B, ho Prezidente komisaun, sira ba too iha Atsabe, sira lao servisu nian, hodi ba hasoru autoridade lokal iha Atsabe, hodi rezolve problema ba komunidade uma kain 4 sai refuziadu ba iha sira nia rain rasik iha Gleno, durante tinan 7 nia laran.

“Depois ami fila, maluk deputada balu kontaktu direta ba iha komandante operasaun brigadeiru Aluk, hodi husu autorizasaun, katak atu bele liu husi Maliana, i ami hetan autorizasaun, maibe tenke uza maskra, labele tuun husi kareta no labele kontaktu ho ema ruma, i labele tula tan ema ruma”, informa Luis.

Nia esplika, ho autorizasaun nee mak komisaun B iha momentu neeba koalia ba malu hodi liu husi Maliana, maibe too iha jalur 10 nian, iha Maliana, sira laautoriza atu liumezmu sira bazeia ba autorizasaun brigadeiru Aluk katak bele liu, maibe ba dalan klaran sira labele liu tanba lahetan autorizasaun.

Entretantu, Prezidente Komisaun B José Augustinho Xomotcho kalrifika katak, atu dehan deit ba deputadu sira no governu katak, sira ba tuur iha PN nee politiku. Situasaun nee laos sira atu hamoe malu, maibe tenke hatene ka rekonese buat neebe sira halo.

Entretantu Prezidente Parlamentu Nasional (PPN) Aniceto Guterres katak, viazem neebe autorizadu nee ba too deit iha Ermera. Kuandu serka sanitariu ona labele tama, se hakarak tama tenke tuir nia dalan, tanba EE agora nee lahensan EE uluk iha 2006 ka 2007, maibe agora nee EE tanba situasaun saude publiku nian.*

Reportajen: Guilhermina Franco/Domingas Soares
Editora: Domingas Gomes

LEAVE A REPLY

Please enter your comment!
Please enter your name here