Politika SEJD Lori Desportu Ba Baze

Politika Sekretariu Estadu, Juventude, no Desportu (SEJD), liu husi husi Diresaun Desportu Eskolar no Komunitariu, tinan nee sei lori desportu ba baze hodi halo kompetisaun. (Foto: STL/Maria Tavares)

DILI, STLNEWS.co – Politika Sekretariu Estadu, Juventude, no Desportu (SEJD), liu husi husi Diresaun Desportu Eskolar no Komunitariu, tinan nee sei lori desportu ba baze hodi halo kompetisaun.

Diretor Nasional Desportu Eskolar no Komunitaria, Guido Monteiro, desportu komunitariu tinan ida nee iha ona planu, tanba politika Sekretariu Estadu Juventude Desportu hatete hakarak lori desportu ba baze.

“Tinan ida desportu komunitariu Ami hakarak halo iha nivel Postu, depois sei kompete husi suku ba suku,” tenik Guido ba STL, iha SEJD, Dili, Kinta (07/01/2021).

Nia esplika estratejia neebe atu halo iha tempu bailoron, tanba tempu bailoron ema hotu halo atividades sempre hatoo proposta mai Sekretaria Estadu, Juventude, no Desportu.

Minimiza atu labele duplika atividade desportivas, Sekretaria Estadu, Juventude, no Desportu fo oportunidade ba suku sira, atu prepara aan didiak atu halo Kompetisaun jogu komunitariu iha nivel postu, neebe sei hahu iha fulan Setembru too iha fulan Novembru.

“Atividade nee sei halao durante halo fulan tolu tomak, tanba atu minimiza Juventude sira labele tuur iha dalan hodi labele konsumu alcohol, oinsa mak atu prense tempu bailoron nee ba iha Jogu komunitaria,” nia esplika.

Nia hatete jogu komunitaria nee rasik sei realiza iha nivel Postu depende ba Postu neebe suku barak sei kompete husi suku ba suku, enkuantu ba postu sira neebe iha suku oituan t bele joga entre Bairru depende survei ba Postu sira.

Entretantu jogu komunitaria nee sei realiza ba munisipiu sanulu resin rua inklui Reijaun Administrativu Espesial Oecusse Ambeno (RAEOA).*

Reportajen: Maria Tavares
Editora: Carme Ximenes

LEAVE A REPLY

Please enter your comment!
Please enter your name here