Populasaun Butuk Iha Entrada Tasi-Tolu; PNTL La Autoriza Sai

Populasaun husi munisipiu tolu (3) hanesan, Bobonaro, Ermera, no Liquiçá, neebe kompostu husi estudante no komunidade, butuk ka hadau malu husi terminal Tasi-Tolu, ba too iha portu entrada, izolamentu nia oin, atu fila ba munisipiu, maibe tanba regras PNTL la autoriza hodi haruka populasaun sira fila. (Foto: STL/Guilhermina Franco)

DILI, STLNEWS.co – Populasaun husi munisipiu tolu (3) hanesan, Bobonaro, Ermera, no Liquiçá, neebe kompostu husi estudante no komunidade, butuk ka hadau malu husi terminal Tasi-Tolu, ba too iha portu entrada, izolamentu nia oin, atu fila ba munisipiu, maibe tanba regras PNTL la autoriza hodi haruka populasaun sira fila.

Komandante Jeral PNTL, Komisariu Faustino da Costa katak, los duni komunidade barak mak intende katak serka sanitaria nee remata iha dia 2 Abril ohin, nee iha interpretasaun mak dehan dia 2 Abril, maibe dia 2 Abril nee too kalan oras 00:59, atu tama ba dia 3 Abril. Maibe serka sanitaria nee iha Dili governu estende tan semana rua, tanba nee haruka sira fila ba ida-idak nia fatin.

“Ita hotu tenke akompana katak, governu estende ona serka sanitaria nee iha iha Dili ba semana 2 tan, i situasaun komunidade butuk malu iha portu entrada nee, laos deit akontese iha portu entrada Tasi-Tolu, maibe ba portu entrada hotu-hotu iha Dili laran atu sai ba munisipiu. Hau nia prezensa iha nee atu fo hanoin ba membru PNTL sira atu esplika ba komunidade sira hotu,” informa Komjer Faustino ba jornalista, Sesta (02/04/2021) iha portu entrada Tasi-Tolu.

Foto: STL/Guilhermina Franco

Nia dehan, ohin nee komunidade sira nakonu hotu iha portu entrada sira tanba atu sai ba munisipiu. Tanba haree ba sira mai hamutuk iha nee kuaze laiha ona distansia sosial ka distansia fizika. Se agora populasaun sira nee mak lafila, entaun posivel hadaet moras nee ba malu tanba virus nee daet la haree ba ema.

Nia afirma, lakohi moras nee hadaet ka transmite ba ema ida ba ema seluk, tanba nee obriga membru PNTL sira iha fatin portu entrada ida-idak, orienta komunidade sira nee ida-idak fila ba uma. Enkuantu ba sira neebe mak iha karta autorizasaun husi Sala Situasaun Sentru Integradu Jestaun Krize sei lao hanesan baibain. Maibe sira neebe laiha autorizasaun husi Sala Situasaun Sentru Integradu Jestaun Krize, ida nee sira tenke ida-idak fila ba sira nia fatin.

Observasaun STL haree katak, dadersan deit kuaze tuku 5 liu, populasaun neebe hakarak atu fila ba sira nia munisipiu, maibe la autoriza husi PNTL, tanba PNTL sira submete ba regras neebe mak iha.

Entretantu situasaun ohin, iha portu entrada Tasi-Tolu, nakonu ho populasaun hahu husi bebe, joven, no ferik katuas sira hadau no butuk malu, hakarak atu fila ba sira nia munisipiu, tanba la aguenta iha Dili neebe implementa serka sanitaria hodi fo impaktu ba sira nia moris. Maibe tanba la iha autorizasaun, komunidade sira nee tenke fila.*

Reportajen: Guilhermina Franco/Madalena Horta
Editora: Domingas Gomes

LEAVE A REPLY

Please enter your comment!
Please enter your name here