Povu Hisik Kosar, Governantes Manan Salariu Boot No Kontinua Bisnis Ilegal

DILI – Reprezentante povu iha uma fukun Parlamentu Nasional kestiona ho hahalok membru governu balun neebe mak manan salariu boot, maibe kontinua buka bisnis iligal iha rai laran.

Preokupasaun nee hatoo husi Deputadu Cesar Valente ba STL, iha uma fukun Parlamentu Nasional, Kinta, (25/10/2016). Deputadu Cesar hateten relasiona ho numeru korupsaun iha Timor Leste, nuudar deputadu seidauk iha serteza lolos maibe nuudar sidadaun ida tenke halo refleksaun liu-liu ba funionariu publiku, governantes no ema sira neebe mak tutela orgaun estadu sira.

Ema balun manan salariu boot no hanoin tan halo bisnis ilegal nee ema kiak sira mos hanoin la hetan tamba ema kiak esforsu loron ida pelumenus han dala ida deit no la hanoin atu ba naok no tamba sa mak manan osan boot sei loke tan bisnis ilegal hodi halo korupsaun,” dehan Deputadu Cesar.

Tuir nia, ema ida neebe mak kiak rabat rai nee no ema sira neebe mak hili foer mak mos tamba halo esforsu loron ida tomak no han etu bikan ida mai husi kosar ben rasik laos mai husi naok. Tamba nee, dalaruma imajina mos la hetan iha mundu ida nee entre ema boot no kiak sira.

Iha fatin ketak, tuir observador Politiku UNDIL Fransisco Mausoro katak labele nega ba realidade neebe mak akontese iha Timor Leste liu-liu kona ba kaju korupsaun. Tamba nee, atu kombate kona ba korupsaun presija vontade husi politikus se lae korupsaun labele halo lakon iha Timor Leste. Informasaun kompletu iha STL Jornal no STL Web, edisaun Sabado (29/10/2016). Domingos Piedade Freitas

 

LEAVE A REPLY

Please enter your comment!
Please enter your name here