Povu Husu Kandidatu Neebe Eleitu Tenki Realiza Promesa

DILI, STLNEWS.co – Populasaun husu ba kandidatu nain rua (2), Kandidatu Fransisco Guterres Lu-Olo no Kandidatu Jose Ramos Horta, ida neebe eleitu ba Prezidente Republika, tenki realiza promesa neebe koalia ona iha kampanha eleitoral prezidente nian.

“Ami hakarak mak tenki realiza promesa sira hatoo iha kampanha eleitoral,” kestaun nee hatoo husi Komunidade Quito Belo ba STL iha Sentru Votasaun EBF Farol, Tersa nee (19/04/2022). 

Nia dehan, entre kandidatu nian rua nee se maka eleitu sai ba Prezidente Republika Timor-Leste nee, sira tenki kumpri, labele iha promesa no promesa deit, maibe la realiza. Tanba povu barak mak terus no balu too ohin loron halerik hela ba bee moos, balu halerik ba estrada, eletrisidade.

Iha fatin hanesan, Komunidade Justino Oliveira dehan, povu tuir ona vota hodi ezerse sira nian direitu, tanba povu persiza Prezidente Republika atu servisu hamutuk ho governu hodi halao dezenvolvimentu iha rai laran.

“Ami nian dezeju mak hakarak, se deit mak Prezidnte Republika Timor-Leste hakarak estabilidade nasaun nee tenki lao diak,” nia  esplika.

Nia sujere ba Prezidente Republika foun katak, presiza servisu hamutuk ho governu para hadia povu nian moris, liu-liu ba dezenvolvimentu pais ida nee nian.

Nunee mos, Komunidade Pascoela da Silva Fereira informa, kandidatu nain rua neebe atu eleitu ba Prezidente Republika, husu atu hadia nasaun nee ho diak, tanba nasaun nee presiza dezenvolvimetu, povu nee presiza kampu trabalhu.

Tanba oras nee daudaun povu seidauk senti ukun aan ida, povu sei halerik ba kampu servisu, povu sei halerik ba bee moos, no eletrisidade inklui estrada.

(jen)

LEAVE A REPLY

Please enter your comment!
Please enter your name here