Povu Moris Iha Terus

Xefe Bankada PD, Antonio da Conceicão. (Foto: Facebook)

DILI, STLNEWS.co – Maski Parlamentu Nasional aprova orsamentu barak ba governu hodi implementa, maibe povu sei moris iha susar no terus nia laran, tanba la asesu ba fasiliades publikus hanesan edukasaun, saude publik, bee mos, sanitasaun no seluk tan.

Kestaun nee hatoo husi Xefe Bankada PD, Antonio da Conceicão, liu husi debate OJE 2020, iha Parlamentu Nasional, Dili, Sesta (02/10/2020).

Nia dehan, laos menus nee buat hotu la iha, maibe kondisaun barak maka att ona no iha parte seluk ekonomia Timor Leste ladun diak, tamba ekonomia importada hotu.

Tanba nee Antonio dehan, investementu produktivu ba agrikultura, peskas tantu turizmu hetan atensaun kiik tebes.

“Se karik problema hirak nee hatudu katak ukun insusesu husi ukun neebe maka antes nee partidu PD mos partisipa, hodi viabiliza hakotu krize politika neebe maka aseita ita nia nasaun hahu husi tinan 2002 mai too 2007, no PD hola responsabilidade ba problema hirak nee,” dehan Xefe Bankada PD nee.

Eis Ministru Edukasaun iha governu da-6 nee hatete, PD husu onestidade partidu sira seluk no lider balu hodi bele rekonese ba situasaun neebe oras nee hasoru, hahu husi 2002 la hanesan ona ho ambiente neebe maka oras nee iha.

“Oras nee ita infrenta situasaun pandemia COVID-19, neebe influensia ba iha prosesu dezenvolvimentu, maibe persiza ho onestu, tanba Krize nee hahu kedas husi 2017, bainhira iha partidu balu hamriik ho opozisaun neebe la fiaran hodi habadak no trava tia governu da-8 nia ukun,”dehan eis Ministru Edukasaun iha governu da-6 nee.

Iha biban nee mos deputadu Antonio esplika, deputadu sira rezeita iha 16 de Janeiru liu ba, signifika ba implikasaun hodi atraza ba iha dezenvolvimentu nasional, mesmu governu ida nee viabilizadu, maibe OJE 2020 no instrumentu politiku ida neebe mak importante tebes, hodi hatudu hikas normalidade, atu halibur parte hotu atu hola dezisaun ba iha interese Nasional.

Nia afirma, dezisaun politika neebe maka orgaun soberania nee halo, maka sei reprodus ou hamosu konsekuensia ba lalaok politika tomak iha Timor.*

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here