AILEU, STLNEWS.co – Komunidade husi Postu Administrativu Remexio, Munisipiu Aileu preokupa ho estrada husi Aileu Vila ba Postu Remexio sei aat, tempu udan kareta motor susar halo movimentu.
Tuir Komunidade Carlos Alberto ba STL iha Suku Acu Mau Segunda nee (01/05/2023) katak, sira nia estrada hahu Timor Leste ukun aan too mai agora estrada mak sai difikuldade boot, tanba tempu udan tahu dodok kareta ho motor susar atu halo movimentu no tempu bailoron rai rahun suar.
“Ema atu ba buka osan hodi sustenta moris mos susar la halimar, tanba nee ami husu governu ida mai agora, favor ida tau matan ba, povu la husu imi fahe osan, maibe povu husu mak hakarak estrada diak, nunee sira bele hodi buka moris rasik,” katak nia.
Nia hatutan, oras nee partidu politiku sira tun kampanha hatoo planu no programa oin-oin, nudar povu rona ona, husu atu kumpri promesa sira nee, nunee hadia estrada no dada ahi mos ba komunidade neebe seidauk asesu ahi eletrisidade no seluk tan.
Nia haktuir, estrada husi Aileu Villa ba Remexio dezde Timor Leste ukun ann too mai agora laiha ema mak hadia, maibe iha dezastre naturais hahu iha 2010 rai halai tomak, nudar povu husu nafatin, tanba nee Lider Karismatiku Xanana Gusmao mak tun mai haree ho matan haruka kompanhia ida mai mobiliza hadia dalan, maibe kontinua aat fila fali.
Tanba nee, husu governu agora se deit mak ukun bele hadia hela estrada, la husu buat seluk, husu mak estrada deit.
Tuir komunidade Jose de Jesus husi Suku Acu-Mau, Postu Administrativu Remexio, Munisipiu Aileu mos husu ukun nain sira atu tau matan ba estrada husi Aileu Vila ba iha Postu Administrativu Remexio too Suku Acu Mau, tanba tempu udan komunidade susar asesu ba merkadu.
“Estrada husi Aileu Villa too Remexio nee estrada aat los, tanba nee husu ita boot sira hatoo ba iha ukun nain sira atu hadia lalais estrada nee para ami lori ami nia produtu ba Dili mos ho diak,” dehan nia.
Nia katak, sira iha produtu lokal, iha mos modo sira, maibe susar atu lori ba merkadu tanba susar ba estrada, tempu bailoron kareta no motor bele tama, maibe tempu udan susar tanba tahu dodok.
Tuir observasaun neebe mak STL hetan husi Dili ba iha Munisipiu Aileu Vila estrada diak, maibe husi Aileu Villa ba iha Postu Administrativu Remexio estrada ladun diak, tanba tahu dodok no kareta ho motor neebe asesu husi dalan publiku presiza halai ho kuidadu.
(eme)
