PPN Halo Enkontru Regular Ho PR

Prezidente Parlamentu Nasional (PPN) Aniceto Guterres halo enkontru regular ho Prezidente Republika Francisco Guterres Lú Olo, hodi relata atividade parlamentu nasional nia ba Xefe Estadu. (Foto: Media PR)

DILI, STLNEWS.co – Prezidente Parlamentu Nasional (PPN) Aniceto Guterres halo enkontru regular ho Prezidente Republika Francisco Guterres Lú Olo, hodi relata atividade parlamentu nasional nia ba Xefe Estadu.

Bainhira remata enkontru, Prezidente Parlamentu Nasional (PPN) Aniceto Guterres hatete, nee enkontru regular hanesan babain presta informasaun ba Prezidente Republika hanesan Xefe Estadu, no liu husi imformasaun hirak nee PR bele halao nia knaar hanesan babain hodi garante regulamentu funsionamentu demokratika.

PPN nee hatete, konstituisaun fo poder ba Prezidente, entau PR presiza informasaun atu akompana regularmente funsionamentu parlamentu nia hanesan orgaun demokratika.

“Reuniaun regular sira nee lao hanesan nee, mai laiha buat seluk koalia partila informasaun relata atividade sira neebe parlamentu halao durante nee.” hatete Prezidente Parlamentu Nasional (PPN) Aniceto Guterres ba jornalista iha Palasiu Prezidente Bairru Pite, Segunda (22/02/2021).

Aniceto hatete, buat neebe mak parlamentu halo loron-loron no jornalista sira asiste hela nemak relata ba iha Prezidente Republika Francisco Guterres Lú Olo.

Iha biban nee PPN informa, konaba atu hadia Parlamentu Nasional nia fatin oras nee iha hela prosesu nia laran hodi prepara ba konstrusaun.

“Agora dadaun prosesu hela atu prepara fatin ba konstrusaun, rai iha tiha ona ba, sei halo estudu depois sei halo dezenu,” nia tenik.

Nunee mos too oras nee seidauk halo levantamentu ba Orsamentu Jeral Estadu ba tinan 2021, PPN dehan nee la prejudika.

“La prejudika ida, seidauk husu osan atu halo tranferensia nee ami seidauk husu osan agora nee sei lao ho atividade kontaktu ho instituisaun sira atu atribui lai fatin ruma neebe parlamentu atu atribui konstrusaun, depois sei halo kontratu loke konkursu kontratu para semak manan konkursu mak halo dezenu, kontratu iha tiha ona mak ba husu osan iha Ministeriu Finansas ami la sente iha problema ho osan seidauk mai nee, tanba saida mak imi hatene dehan osan seidauk mai nee, ka keta osan tauk lakoi mai ka,” katak nia.

Aniceto dehan sira la sente iha problema konaba isu osan neebe mak lamai iha Timor Leste, tanba nee mak nia dehan jornalista lalika fiar propaganda husi liur koalia nee.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here