PPN: Tinan Ida Nee PN Aprova OJE Rua

Prezidente Parlamentu Nasional (PPN) Aniceto Guterres. (Foto: Media PN)

DILI, STLNEWS.co – Prezidente Parlamentu Nasional Aniceto Guterres hatete tinan ida nee Parlamentu Nasional tenke aprova Orsamentu Jeral Estadu rua nomos lei sira neebe estadu emerjensia nia.

Prezidente Parlamentu Nasional Aniceto Guterres hatoo kestaun nee ba jornalista bainhira remata hasoru malu ho Prezidente Republika Francisco Guterres Lú Olo iha Palasiu Prezidente Bairru Pite, Tersa (22/12/2020).

“Primeiru sei fo prioridade ba leis ka insiativa neebe agora iha hela Parlamentu Nasional pendente hela tanba iha Orsamentu Jeral Estadu Parlamentu Nasional tinan ida nee tenke aprova Orsamentu Jeral Estadu rua ho lei sira neebe estadu emerjensia dala barak,” dehan Aniceto.

Prezidente Parlamentu Nasional hatutan inisiativa barak neebe pendente sira iha Parlamentu Nasional ida nee PN tenke resolve mos klaru katak tinan ida nee iha inisiativa sira seluk, liu-liu mai husi governu inisiativa balun neebe importante PN tenke fo prioridade.

Nunee mos Hanesan kona-ba lei orsamentu jestaun finanseira neebe governu prepara hela ona lei foun atu troka, laos halo revizaun maibe nee atu troka lei foun ida, lei orsamentu jestaun finanseira.

Lei sira neebe liga ho politika ninian, lei eleitoral tanba 2022 tama ona prezidensiais entaun PN tenke haree mos lei eleitoral no hapara ho lei eleitoral, sei haree mos lei partidu politiku sira maibe sira nee hotu Parlamentu Nasional hein deit inisiativa husi governu neebe devia governu maka hola inisiativa.

PPN hatutan se governu aprezenta mai PN tenke fo prioridade tanba besik daudauk ona eleisaun.

Iha biban nee hatete konaba konstrusaun edifisiu foun ba Parlamentu Nasional neebe kompleta ho rezidensia deputadu no deputada sira nee hein Orsamentu Jeral Estadu (OJE) 2021 neebe agora daudaun nee iha hela Prezidente Republika Francisco Guterres Lú Olo sei analiza bainhira promulga maka foin haree no mos akizasaun ba kareta 35 ba deputadu sira neebe too agora seidauk tama.

Aniceto hatutan konstrusaun edifisiu foun ba Parlamentu Nasional neebe kompleta ho rezidensia deputadu no deputada sira nee, osan laiha, agora koalia hela deit prosesu neebe osan seidauk iha, osan iha ona ba maka, bele koalia prosesu, maibe normal hanesan halo edifisiu bai-bain tenke iha dezenu, tenke halo estudu nee mos tenke iha.

Nia hatutan agora foin ba hahu dezenu mos seidauk iha, koalia ka politiza ba halo propaganda dehan agora Parlamentu Nasional atu halo uma ba deputadu sira prontu orsida pronunsia tan orsida buat barak tan.

Nunee mos akizasaun ba kareta 35 ba deputadu no deputada sira neebe too agora seidauk tama nee, Aniceto dehan Orsamentu Jeral Estadu (OJE) 2021 Prezidente Republika Francisco Guterres Lu Olo seidauk promulga halo nusa maka nia bele marka ona bainhira.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here