PR: 28 Novembru Deside Hatun Bandeira Kolonial, Hasae RDTL

Prezidente Republika Francisco Guterres Lú Olo hatete, komemora 28 Novembru ida nee afirma fila fali identidade Timor nuudar povu uniku ba libertasaun ukun rasik aan, no iha momentu neeba mak deside hatun bendeira kolonial no hasae bandeira RDTL. (Foto: STL/Donaciano Magalhães)

LIQUICA, STLNEWS.co – Prezidente Republika Francisco Guterres Lú Olo hatete, komemora 28 Novembru ida nee afirma fila fali identidade Timor nuudar povu uniku ba libertasaun ukun rasik aan, no iha momentu neeba mak deside hatun bendeira kolonial no hasae bandeira RDTL.

Kestaun nee hatoo husi Prezidente Republika Francisco Guterres Lú Olo liu husi nia diskursu bainhira komemora 28 Novembru ba dala 45 iha Munisipiu Liquica, Sabado (28/11/2020).

Prezidente Republika hatete tinan-tinan Governu Timor-Leste lori programa selebrasaun 28 Novembru 1975 ba Munisipiu ida. Tinan ida nee Munsípiu Liquica mak sai fatin hodi hamanas nasionalismu no patriotismu iha loron istoriku importante ida nee.

“Ita halao ona atu formal hasae Bandeira RDTL akompana ho ita-nia Hinu Nasional, nuudar símbolu rua ba soberania, indepedensia, unidade no integridade Timor-Leste nian. Ho serimonia ida nee ita-nia neon halai kedas ba ita-nia luta libertasaun nasional naruk no nakonu ho susar oioin. Ohin ita afirma nafatin ita-nia identidade nasional, neebe identifika ita nuudar povu uniku ho kbiit rasik no hakarak rasik, harii nasaun – hanaran kedas Timor-Leste, bainhira ita hahu movimentu libertasaun nasional iha 1974, Atu afirma ita-nia identidade nuudar Timoroan, mak Comite Central FRETILIN deside halo Proklamasaun Unilateral Indepedensia, iha 28 novembru 1975. orgaun masimu nee deside mesak hatun bandeira kolonial Portugeza no hasae fali bandeira RDTL, nuudar simbolu ba estadu soberanu no independente, Timor-Leste, akompana ho Hinu Nasional, Patria Patria.” Hatete PR Lú Olo.

PR hatutan Iha 30 Novembru 1975, membru governu dahuluk Timor-Leste halo juramentu serví povu no nasaun Timor-Leste, iha Palasiu Lahane, Díli.

“Ita harii ita-nia Estadu soberanu no independente ho Konstituisaun kiik no simples ida, maibe natoon atu ukun rasik-an no hetan rekonesimentu husi komunidade internasional iha 2002. Tuir mai hau haklaken ba maluk sira, liu liu ba joven sira, atu komprende didiak signifikadu loron ohin nian.” hatete Lú Olo.

Xefe estadu hatutan hafoin konflitu armadu entre Timoroan iha fulan Agostu 75 ramata no FRETILIN ukun “de faktu” no, tanba Portugal la fila nuudar potensia administrante ba Timor-Leste, Comite Central FRETILIN iha hanoin atu proklama indepedensia Timor-Leste nian, iha 1 Dezembru 1975.

Maibe tanba inimigu hahu tama dadaun mai territoriu laran, husi fronteira-rai, líder FRETILIN sira adianta tiha proklamasaun unilateral indepedensia ba 28 novembru 1975.

Nasaun lubuk ida, inklui eis-kolonia lima Portugal nian, iha Afrika, hanesan Moçambique, Angola, Guiné-Bissau, Cabo Verde no São Tomé e Príncipe, rekonese kedas proklamasaun unilateral indepedensia husi FRETILIN, iha 28 novembru 1975. Ho tan nasaun balun seluk ninia apoiu no komunidade internasional ninia dedikasaun tomak, tinan ba tinan, mak TL konsege kaer metin kestaun Timor-Leste iha ajenda Nasoins Unidas too hetan ukun rasik-an, liu husi referendu organiza husi ONU rasik.

“Ohin ita hakruuk ba ita-nia asuain sira neebe fo-an tomak ba ita-nia indepedensia, liu husi sira-nia dedikasaun tomak. Barak tebes mak fo sira-nia vida rasik no sakrifika sira-nia família. Asuain sira iha rai-laran mak kaer prosesu luta. Maibe ita labele haluha mos sira neebe dedika mos sira-nia vida tomak, iha rai-liur, ba luta libertasaun nasional durante tinan rua nulu resin haat. Ita mos labele haluha kontribuisaun husi Igreja Katolika ba ita-nia luta libertasaun nasional.” hatete Lú Olo*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here