PR Atribui Premiu Sergio Vieira de Mello Ba Manan Nain 5

Prezidente Republika, Francisco Guterres Lú Olo, ohin, sei atribui Premiu Direitus Umanus “Sergio Vieira Mello” ba edisaun-13 ba manan-nain nain-lima (5). Manan-nain nain-lima, iha tinan barak nia laran, hatudu husi ezemplu serbisu hodi defende, promove no divulga direitus umanus iha Timor-Leste. (Foto: Facebook)

DILI, STLNEWS.co – Prezidente Republika, Francisco Guterres Lú Olo, ohin, sei atribui Premiu Direitus Umanus “Sergio Vieira de Mello” ba edisaun-13 ba manan-nain nain-lima (5). Manan-nain nain-lima, iha tinan barak nia laran, hatudu husi ezemplu serbisu hodi defende, promove no divulga direitus umanus iha Timor-Leste.

Liu husi komunikadu neebe STL, asesu husi midia PR Kinta (10/12/2020) hatete, liu husi Dekretu Prezidente Republika numeru 71/2020, 10 Dezembru, Xefe Estadu sei atribui Premiu Direitus Umanus Sergio Vieira de Mello ba manan-nain ho kategoria Direitus Sosiais, Ekonomikus no Kulturais ba Cosme dos Santos Freitas, Pe. Martin Antonio Pablo Abad Santos, S.J, Deolindo da Costa no Leopoldina Joana Guterres. Manan-nain ba kategoria Direitus Sivil no Polítikus mak Fokupers.

Komunikadu imprensa nee dehan tinan-tinan iha loron adosaun Deklarasaun Universal Direitus Umanus iha Asembleia Jeral Organizasoins Nasoins Unidas, neebe konesidu nuudar Loron Internasional ba Direitus Umanus, 10 Dezembru, Prezidente Republika atribui Premiu Direitus Umanus Sergio Vieira de Mello ba sidadaun no organizasoins neebe promove, defende no divulga direitus umanus iha Timor-Leste.

Anualmente, Prezidente Republika loke oportunidade ba sidadaun Timoroan no estranjeiru husi organizasaun governamentais no laos governamentais atu hatama sira-nia kandidatura ba Premiu Direitus Umanus Sergio Vieira de Mello tuir kriteriu sira neebe estabese.

Hafoin Conselho de Agraciamentos e Ordens Honoríficas halo analize, apresiasaun no vizitas ba fatin implementasaun atividade husi kandidatu sira, orgaun konsultiva nee sei hatoo ba Prezidente Republika atu deside manan-nain ba Premiu.

Premiu Direitus Umanus Sergio Vieira de Mello tuir karta komunikadu imprensa nee katak, harii ho Dekretu-Lei numeru 15/2009, 18 Marsu, atu rekonese no destaka atividade sidadaun timoroan no estranjeiru, husi organizasaun governamentais no laos governamentais, ba promosaun, defeza no divulgasaun Direitus Umanus iha Timor-Leste.

Kada manan-nain sei hetan premiu ho valor osan US$ 10.000. Premiu Direitus Umanus hahu iha tinan-2008, liu husi inisiativa Prezidente Republika, Laureadu Nobel da Páz, Jose Ramos Horta atribui ba sidadaun ka organizasaun governamental ka laos governamental, husi Timor-Leste ka husi estranjeiru hodi promove, defende no divulga direitus umanus iha Timor-Leste.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here