PR Halo Inspesaun Ba Kareta Kompetisaun Off Road

DILI, STLNEWS.co – Prezidente Republika Jose Ramos Horta hamutuk ho ekipa husi Indonezia halo inspesaun ba kareta neebe mak sei halo kompetisaun Off Road.

Afirma Asesor Tekniku Prezidensial Republika, Agostinho Caet ba jornalista sira, bainhira remata halo inspesaun ba kareta iha Palasiu Prezidente Nicolao Lobato, Bairo Pite, Sesta (01/09/2023).

Nia hatete, nee hanesan regra ida bainhira halo kompetisaun tenki halo uluk inspesaun.

“Nee hanesan regra ida antes tuir kompetisaun, ida nee exelensia Prezidente mak husu rasik atu halo inspensaun, tanba nee mak komisaun kordena hamutuk organiza ohin dader nee sira mai iha nee para halo inspensaun ikus atu haree kareta ida neebe mak iha kondisaun diak tuir rekejitu neebe mak sira hatuur ona, no ekipa ida husi Jakarta sira mak agora dadaun halo hela inspesaun iha nee haree ida neebe mak bele tuir kompetisaun aban no ida neebe mak labele tuir,” dehan asesor nee.

Asesor katak, prezidensial Republika hamutuk ho ekipa ida husi Jakarta mak halo inspesaun ba kareta sira neebe mak halo kompetisaun, hodi haree kareta nia kondisaun nunee evita labele iha risku iha tempu kompetisaun.

Iha fatin hanesan, Sekretariu Jeral Federasaun, Off Road iha Timor Leste , Aking Ung hatete, ohin iha Palasiu Prezidente, Prezidente halo bemvindo ba partisipante husi Timor Osidental, no kontinua ho ekipa sira halo inspeksaun ba kareta neebe mak sei halo kompetisaun.

“Nunee asegura duni katak kareta sira nee tuir duni espesifikasaun neebe mak husi Reis Komite nomos komisaun organizadora prepara ona,” katak Sekjer.

Nia hatete, kareta hamutuk 32 mak halo inspesaun ohin, nee la signifika sei liu hotu, maibe ida neebe mak la liu komisaun sei fo oportunidade ba sira para modifikasaun ba kareta atu tuir fali ho seguru.

Nia hatutan, eventu Off Road nee sei realiza iha loron Sabadu iha sirkuit Tibar, depois kontinua iha loron Domingu finais iha Tibar.

Nunee mos ekipa neebe mak tuir eventu kompetisaun OFF Road nee husi Timor Osidental iha Klubu 8 no Timor Leste iha klubu 5, maibe agora daudaun sei iha prosesu inspesaun.

(eme)

LEAVE A REPLY

Please enter your comment!
Please enter your name here