PR Halo Promosaun Ba Postu Ofisial Jeneral no Jenerais

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guterres Lú Olo, halo promosaun ba postu ofisial jeneral no jenerais.

Liu husi komunikadu neebe STL asesu husi Media PR (Kinta 25/05/2021), Prezidente Republika, Francisco Guterres Lú Olo, hafoin simu proposta husi Governu no rona Konsellu Superior Defeza no Seguransa dekreta promosaun Coronel Calisto Santos Coli ‘Coliati’ ba postu Brigadeiru Jeneral, Kapitaun Mar e Guerra Donaciano do Rosário da Costa Gomes ‘Pedro Klamar Fuik’ ba postu Komodoro, Brigadeiru-Jenerál Domingos Raul ‘Falur Rate Laek’ ba postu Maior-Jenerál no Maior-Jenerál Tito da Costa Cristovão ‘Lere Anan Timur’ ba Tenente-Jenerál.

Promosaun ba postu ofisial Jenerál no Jenerais bazeia ba Estatutu Militár F-FDTL Foun neebe aporova liu husi Dekretu-Lei numeru 33/2020, 2 setembru.

Tuir Estatu Militar F-FDTL Foun, numeru 1 husi artigu 261 hatete katak kargu Xefe Estadu-Maior Forsas Armadas okupa husi militar ida ho postu Brigadeiru-Jeneral ou Komodoro.

Promosaun ba Donaciano Gomes atu viabiliza oportunidade ba ninia funsaun iha futuru hodi lidera misoins internasionais ba manutensaun paz neebe organiza husi Nasoins Unidas.

Numeru 1 husi artigu 260 Dekretu-Lei nee hatete katak Vise-Xefe Estadu-Maior-Jeneral Forsas Armadas okupa husi militar ida ho postu Major-Jeneral ou Kontra-Almirante.

Estatu Militar F-FDTL Foun iha artigu 259 numeru fo sai katak kargu Xefe Estadu Maior Jeneral Forsas Armadas okupa husi militar ida ho postu Tenente-Jeneral ou Vise-Almirante.

Dispozisaun Estatutu Militar F-FDTL foun obriga Governu atu aprezenta ba Prezidente Republika atu halo promosaun ba postu ofisial Jeneral no Jenerais hodi ezerse sira-nia funsaun.

Calisto Santos Coli ‘Coliati’ iha fevereiru 2011 promove sai koronel no hahu okupa kargu Xefe Estadu-Maior iha Outubru 2018.

Donanciano Gomes ‘Pedro Klamar Fuik’ hetan promosaun ba Kapitaun Mar-e-Guerra iha 2010 no nomeadu ba Diretor Institutu Defeza Nasional iha 2012.

Domingos Raul ‘Falur Rate Laek’ hetan promosaun ba Brigadeiru-Jeneral iha juñu 2018 no komesa okupa kargu Vise-Xefe Estadu-Maior-Jeneral iha outubru tinan hanesan.

Lere Anan Timur hetan promosaun ba Brigadeiru-Jeneral no okupa kargu Vise-Xefe Estadu-Maior-Jeneral iha novembru 2009. Promove ba Maior-Jeneral no hahu ninia funsaun nuudar Xefe Estadu-Maior Jeneral F-FDTL iha outubru 2011.

Prezidente Republika sei prezide serimonia promosaun ba Postu Ofisiál Jeneral no Jenerais, aban, 26 fevereiru 2021, tuku 09.00, iha Palasiu Prezidensial Nicolau Lobato.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here