PR Hatoo Saudasaun Ba F-FDTL Neebe Komemora Aniversariu Ba 20

Xefe Casa Sivil, Francisco Maria de Vasconcelos. (Foto: Media PR)

DILI, STLNEWS.co – Prezidente Republika (PR) Francisco Guterres Lú Olo, hatoo saudasaun ba F-FDTL neebe mak komemorasaun aniversáriu ba dala 20.

Mensajen PR nee lee husi Xefe Casa Sivil, Francisco Maria de Vasconcelos iha Kuartel Jeral, Fatuhada, Tersa (02/02/2021), hatete haree ba evolusaun preokupante husi pandemia neebe hamosu husi corona virus foun, no medidas ezekusaun neebe Governu aprova ona ba Estadu Emerjensia hodi prevene no kontrola COVID-19 atu la hadaet iha Timor-Leste, maka ba tinan ida-nee loron FALINTIL- Forsa Defeza Timor-Leste (F-FDTL) labele komemora hanesan tinan sira uluk nian.

“Maske nunee nuudar Prezidente Republika no Komandante Supremu Forsas Armadas, hau hakarak aproveita selebra aniversariu FALINTIL-Forsa Defeza Timor Leste (F-FDTL) dala ida tan hodi hatoo hau-nia saudasaun no liafuan insentivu ba sira hotu neebe envolve iha instituisaun ida nee militar no sivil, feto ho mane tanba sira-nia dedikasaun tomak hodi serbi ho diak ita nia rain no povu Timoroan.” Katak PR.

Mensajen PR hatete, sentimentu ida-nee mosu tanba haree maneira oinsa forsas armadas durante nee halao sira-nia misaun, sira-nia kontribuisaun ba hametin ambiente koezaun, estabilidade no seguransa, liu husi unidade no disiplina neebe sira rasik kaer metin, atu tane valor aas sira-neebe sai nuudar matadalan ba ezistensia koletiva nuudar nasaun independente.

Nia hatete hodi hasoru krize boot hanesan ida neebe agora hasoru daudaun, autoridade kompetente sira tenke serbisu makaas lapara no efikas, no hetan partisipasaun husi komunidade sira tomak.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here