PR Husu Povu Koopera Ho Governu

Prezidente Republika (PR), Francisco Guterres Lú Olo. (Foto: Media PR)

DILI, STLNEWS co – Iha estadu emerejensia ba dala sanulu resin ida, Prezidente Republika Francisco Guterres Lú Olo husu sidadaun no povu tomak atu koopera nafatin ho governu, nunee bele kombate moras pandemia Covid-19 iha rai laran.

Xefe Estadu hatete, Covid-19 sobu ona ema tokon ba tokon nia moris iha mundu tomak no hamate ona ema hamutuk besik ona millaun tolu. Moras nee hahu daet dadaun iha Timor Leste, no bainhira moras Covid-19 hahu tama mai Timor Leste iha 21 Marsu 2020, estadu Timor Leste halo kedas alerta ba povu tomak kona ba inimigu perigozu ida nee. Estadu tomak hamrik hamutuk no hatan kedas ho estadu de emerjensia dahuluk iha loron 28 Marsu 2020.

“Ohin ita tama iha estadu de emerjensia sanulu resin ida, neebe ezije ba sidadaun no ba ita idak atu koopera liutan ho governu. Tanba Covid-19 kona no daet ona ba ita nia populasaun, hahu husi Munisípiu Bobonaro, Fatumea, Tilomar, Munisipiu Covalima too Dili, Baucau no Viqueque. Situasaun ida nee obriga governu hola medidas ba konfinamentu obrigatoriu no serka sanitaria,” PR Lú Olo hatoo mensajen nee ba jornalista iha Palasiu Prezidensia Bairo Pite, Sesta (19/03/2021).

Lú Olo dehan, medidas husi governu muda ema hotu nia vida ka moris baibain. Prezidente Republika iha konsiensia katak, nee todan duni ba populasaun, maibe governu mos la haluha nia povu. Entre mate ba Covid-19 no mate hamlaha, governu buka dalan nafatin atu flexibiliza ninia medida sira no hola tan medida sira seluk tuir mai hodi fo tulun ba populasaun.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here