PR Kansela Lansa Livru Buibere Ukun Rasik Aan

DILI, STLNEWS.co – Numeru Covid-19 neebe aumenta iha rai laran, halo Prezidente Republika, Francisco Guterres Lú Olo kansela lansa livru Buibere Hamriik Ukun Rasik Aan.

Liu husi karta komunikadu neebe STL asesu husi Midia PR, Segunda (08/03/2021) hatete, serimonia lansamentu Livru Buibere Hamriik Ukun Rasik Aan Kanseladu, tanba haree ba kazu foun transmisaun lokal iha Díli.

Nuudar dalan prevensaun no kontrolu ba Covid-19 atu la hadaet ba beibeik, Prezidensia Republika foti desizaun kansela serimonia lansamentu livru Buibere Hamriik Ukun Rasik Aan neebe tuir planu, atu halao ohin, 8 Marsu 2021, tuku 16.00.

Karta komunikadu nee hatutan, data foun ba serimonia lansamentu livru Buibere Hamriik Ukun Rasik Aan sei determina, tuir evolusaun moras corona vírus iha rai-laran no medidas implementasaun Estadu Emerjensia husi Governu.

Serimonia lansamentu livru Buibere Hamriik Ukun Rasik Aan marka ba 8 Marsu hodi selebra Loron Internasional Feto no mos nuudar loron ida atu fo-hanoin, rekonese no valoriza kontribuisaun feto Timor sira-nian ba independensia nasional Timor-Leste neebe foi sai iha obra koletiva ida nee.

“Maski serimonia ba lansamentu livru kansela, ita bele selebra nafatin Loron Internasional Feto, iha ita ida-idak nia fatin, hahu kedas husi ita-nia uma laran, serbisu fatin no iha sosiedade atu hamutuk luta hasoru diskriminasaun oioin hasoru feto, violensia domestika no abuzu seksual neebe hamosu trauma oioin,” dehan karta komunikadu nee.

Karta komunikadu nee esplika, ema ida-idak tenke kontribui hodi hotu hotu, feto no mane, moris ho laran-hamatek, domin no respeitu no nunee, garante justisa sosial pas no estabilidade iha Timor-Leste livre no independente.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here