PR Kansela Natal Hamutuk Ho Loron Eroi

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Republika (PR) Francisco Guterres Lú Olo, kansela programa boot rua iha Palásiu Prezidensial Nicolau Lobato, hanesan programa Festa Natal ho funsionario no kolaborador sira iha 29 Dezembru.

Programa boot ida seluk mak atu komemora ohin, iha Palásiu ne’e, loron Eroína no Erói sira-nian.

Prezidente Republika (PR) Francisco Guterres Lú Olo, hateten katak, hafoin Konsellu Ministrus foti medida foun konaba proteje povu husi Covid-19 iha ambitu estadu emerjensia da sia (EE da-9), Prezidente Repúblika kansela kedas programa boot rua iha Palásiu Prezidensial Nicolau Lobato, hateten Prezidente Republika iha Palásio Prezidensiál Nicolau Lobato Dili, Kinta (31/12/2020).

“Programa ida mak festa Natal ho funsionáriu no kolaborador sira iha 29 Dezembru. Programa boot ida seluk mak atu komemora ohin, iha Palásiu ne’e, Loron Eroína no Erói sira-nian,” dehan PR.

PR hatutan ho desizaun rua ne’e, Prezidente Repúblika kumpre regras governu hatuur atu prevene no kombate Covid-19, karik hada’et ba komunidade.

“Regra ida husi governu mak ita labele halibur ema liu sanulu (10) iha fatin ida. Regra ida ne’e la aplika ba família ho ema hirak ne’ebé hela hamutuk iha uma ida de’it biar liu sanulu.” tenika Aman ba Nasaun ne’e.

Liu husi mensájen ida ne’e, Prezidente Repúblika apela ba ema ida-idak fase liman beibeik, uza máskara no hadook-an malu metru ida, pelu menus.

Ida-idak tenke hatene kuidadu-an hodi bele mós tau matan ba família, belun, kolega, povu no país tomak.

Reportajen: Claudios de Jesus
Editor: Ekipa STL

LEAVE A REPLY

Please enter your comment!
Please enter your name here