PR Kondekora Ordem TL Grau Colar Titulu Postumu Ba Buibere Bi Kiak

DILI, STLNEWS.co – Prezidente Republika Francisco Guterres Lu Olo Kondekora Ordem Timor leste Grau Colar Titulu Postumu Ba Saudoza Merita Alves Bi Kiak.

PR Lu Olo Liu Husi Diskursu Bainhira halo lansamentu ba livru Buibere Hamriik Ukun rasik aan Kinta kalan (10/06/2021) hatete Buibere Merita Alves Bi-Kiak neebe husik ona mundu iha 24 maiu liuba. Bainhira moras hela, sempre preokupa ho lansamentu livru ida nee nuudar dalan ida atu haklaken no lori sosiedade tomak atu rekonese no valoriza feto.

PR hatete Ho mos informasaun husi vídeo hatudu husi livru no dokumentasaun sira seluk PR lee ona no mos husi testemuñu oioin, inklui husi PR rasik.

Xefe Estadu hatutan buibere Merita Alves hatudu duni ba ema hotu oinsa nia kumpre dever serve Patria. Haree ba nia ezemplu entermus dedikasaun, barani, espíritu sakrifísiu no determinasaun, iha períodu tomak luta libertasaun nasional no, iha mos iha tempu ukun an, atu hatuur jutisa sosial.

“Prezidente Republika deside fo onra, títulu postumu, ba Buibere Merita Alves Bi Kiak, ho kondekorasaun Ordem Timor-Leste, grau Colar, títulu póstumu. Grau ida nee as liu neebe Prezidente Republika bele fo ba entidade ka individualidade, tuir Dekretu-Lei numeru 20/2009 ho data 6 maiu, Ordem de Timor-Leste.” Hatete PR

Ho kondekorasaun espesial nee, Prezidente Republika, ho Estadu Timor-Leste nia naran, hasae as memoria eroina ida nian neebe husik hela legadu boot ida ba ema hotu.
PR hatutan Loron ba lansamentu livru importante nee no kondekorasaun ba saudoza Buibere Merita Alves akontese hotu iha data istorika importante ida ba luta libertasaun nasional. Hafoin Bases de Apoio rahun iha 1979, inimigu hanoin katak Rezistensia mate tiha ona no fo sai ba mundu katak Povu Timur-Timur hili tiha ona dalan integrasaun no pembangunan ho Indonezia. Maibe, membru sobrevivente FALINTIL sira, neebe organiza-an fila fali iha arredores no Dili laran, konsege duni fo sinal oin seluk ba mundu ho levantamentu iha Marabia, iha loron 10 junu 1980.

Ho forsa kiik ida, besik ema atus ida rua nulu ho kilat neen nulu resin, FALINTIL, ho apoiu populasaun nian, halo asaltu ba fatin sira neebe tropa indoneziu hela, hanesan Marabia, Dare, Fatunaba no Becora.

Objetivu atake nee nian mak hatudu ba mundu katak FRETILIN sei eziste iha Timor-Leste no, funu ba Ukun Rasik An sei kontinua!

Hetan duni objetivu ida nee maibe inimigu kaer no lori-lakon too ohin loron Timor oan ema liu atus ida rua nulu.

Barak mak hetan dadur, inklui desterru ba Ataúro no balun tenke hatan ba interrogatoriu beibeik.

“Partisipa iha serimonia ida nee, eis-prizioneira ida, ita-nia Buibere Catarina de Araújo, neebe ohin loron kaer kargu nuudar Vise-Presidente Comisaun 10 de Junho de 1980, Marabia. Hein katak partisipante no vítima sira sei publika mos livru ruma hodi sura loloos sira-nia istoria barani.” Hatete nia.

PR mos bolu atensaun hotuhotu nian ba situasaun feto sira-nian iha sosiedade ohin loron. No Livru “Hamriik Ukun Rasik An” hatudu prova barak katak ho duni feto sira-nia kontribuisaun mak konsege hetan Ukun rasik an.

“Feto sira mos sai eroina iha tempu luta ba Ukun Rasik An. Tanba ita-nia Luta Libertasaun Nasional envolve mos feto, Konstituisaun hatuur mos direitu hanesan entre feto no mane no ita hatuur polítika edukasaun ba ema hotu, dalan nakloke liutan ona ba ita-nia feto sira atu partisipa iha prosesu dezenvolvimentu nasional. Biar dalan nakloke dadaun, ita hotu hatene katak feto barak tebes mak moris ho tauk no halerik subar hela iha uma. Situasaun sira nee akontese tanba ema barak sei kaer metin tradisaun negativu neebe hanehan feto makaas.” katak Lu Olo.

Aman Nasaun hatutan Feto barak hasoru hela violensia domestika no abuzu seksual ho forma oin oin, inklui labarik-feto sira.

“Atu lori ita-nia País ba oin ho susesu, ita tenke hakotu hodi biit no lalais abuzu sira iha uma laran ka ha fatin neebe deit, ho razaun neebe deit.” Katak nia.

Prezidente Republika fiar katak liu husi edukasaun ho valores hanesan domin, respeitu no espíritu solidariedade entre ema, hahu husi otas kiik kedas, mak bele hadiak sosiedade ninia komportamentu ba aban bairua.

“Ba jerasaun ohin loron nian, hau aproveita oportunidade ida nee hodi apela ba família no sosiedade tomak no ba entidade hothotu, atu hadomi no respeita liu tan ita-nia feto sira, tanba sira mak ai-rin metin ba família no ba sosiedade.” katak nia.

Lu Olo mos Husu boot ba Parlamentu Nasional, Governu, PNTL, Prokuradoria-Jeral Republika no Tribunal sira atu hamutuk proteje vítima sira, inklui labarik feto sira, no hatuur justisa loloos ba sira neebe komete krime.

“Tanba ita hasae ohin memoria eroína no eroi sira-nian asosiadu ho levantamentu Marabia, Prezidente Republika husu ba hothotu atu buka dalan atu nakfilak sira-nia mehi ba realidade. Sira luta ba liberta Povu, inkui mos ita-nia feto sira iha Timor-Leste tomak Nee mak mehi boot mos husik hela husi ita-nia feton, bin ka alin Merita Alves “Bi Kiak” neebéme Prezidente Republika ohin kondekora ho Ordem Timor-Leste atu fo honra nuudar eroína Timor-Leste.” Hatete Lu Olo.

Nia hatutan ho lalaok ida nee, Prezidente Repúblika konvida jerasaun foun atu banati tuir ninia ezemplu. Ho apoiu husi hotu hotu, liuliu husi Governu, liu husi Conselho dos Combatentes da Libertação Nasional, Museu da Resistência no Centro Chega, Prezidente Repúblika hein katak Comissão de Pesquisa e Elaboração da História da Luta da Mulher Timor sei hakaat ho susesu ba publikasaun faze daruak: Kombatente feto ida, istória ida! Nunee, Halo Povu Timor-Leste nia istoria rasik.

Nunee mos oan husi saudoza Bi Kiak Jordão de Araújo Hatoo Agradese Ba PR neebe mak Konvida sira hodi partisipa serimonia nee.

“Ami husi familia Merita Alves nian ami senti ksolok tebes-tebes bele hetan komvite husi Prezidensiá no OPMT hola parte iha serimónia ida nee hau bele dehan katak ami sente suprendente ho aprezentasaun neebe hatudu i hau rasik hau senti orgullu hanesan oan ida husi saudoza Merita Alves i ohin hau haree kolegas barak ema barak liu husi aprezentasaun vidio neebe iha” hatete Oan mane Bi Kiak.

Jordao hatutan maske inan husik ona sira maibe husik hela lembaransa neebe furak liu husi Luta neebe mak naruk.

“Hau senti orgullu tebe-tebes tanba hau nia inan iha nia moris husik legadu diak ida neebe sai hanesan edukadora sai hanesan inspiradora sai hanesan hotu lutadora ba feto nia direitu i nunee mos sai hanesan kontribuidora ba dezenvolvimentu Timor Leste” katak nia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun; EP1

STLNEWS.co – Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun • EPISODE 1: Drama Kakaluk Ba Corona https://youtu.be/VQBkF8ES8GE • dr. Odete Maria Freitas Belo,...

TL Seidauk Tempu Ba Expo Dubai

DILI, STLNEWS.co - Timor Leste atu partisipa iha Expo Dubai, maibe haree ba situasaun agora povu sofre ba situasaun Covid-19 no kalamidade, tanba nee...

Akontesementu Meza PPN Rahun; MP Notifika Deputadu CNRT Nain 8

DILI, STLNEWS.co - Relasiona ho akontesementu meza Prezidente Parlamentu Nasional (PPN) rahun iha loron 18-19 Maiu 2020, Ministeriu Publiku (MP) fo ona karta notifikasaun...
%d bloggers like this: