PR Kongratula Komandante F-FDTL Hetan Promosaun

Prezidente Republika, Francisco Guterres Lú Olo, hatoo kongratulasaun ba Komandante Falintil Forsa Defeza Timor Leste (F-FDTL) sira, neebe hetan promosaun ba Postu Ofisial Jeneral no Jenerais. (Foto: STL/Emerenciana Pinto)

DILI, STLNEWS – Prezidente Republika, Francisco Guterres Lú Olo, hatoo kongratulasaun ba Komandante Falintil Forsa Defeza Timor Leste (F-FDTL) sira, neebe hetan promosaun ba Postu Ofisial Jeneral no Jenerais.

“Uluk liu hau hakarak hatoo hau nia parabens no liafuan korajen. Promosaun sira neebe halao ohin importante teb-tebes ba instituisaun militar nuudar konsekuensia hosi reforma neebe lao daudaun hela ba reorganiza makroestrutura defeza nasional, neebe orienta hosi Konseitu Estratejiku Defeza no Seguransa Nasional nuudar matadalan estratejiku, inklui mos dokumentu estruturante sira seluk hosi estratejia militar neebe mak tama ona faze ikus aprovasaun nian,” dehan Xefe Estadu liu husi diskursu, iha Palasiu Prezidente Nicolau Lobato, Bairru Pite, Dili Sesta (26/02/2021).

Aman ba nasaun nee hatete, iha aprovasaun estatutu militar foun FALINTIL-Forsa Defeza Timor-Leste (F-FDTL) responsavel sira buka adapta ba reforma sira neebe halo daudaun hodi hadia aspetu balun iha estatutu kondisaun militar nian hodi labele sees husi mudansa sira seluk neebe akontese tiha ona. Ajustamentu sira nee halo iha ambitu FALINTIL-Forsas Defeza Timor-Leste (F-FDTL) nia makroestrutura, jestaun ba efetivu militar sira no iha ninia prosesu modernizasaun.

Iha estatutu militar sira nian, aleinde mudansa sira seluk, muda ona naran ba postu ofisial jeneral atu labele sees hosi naran sira neebe país belun sira uza ba sira-nia Forsas Armadas. Purezemplu, ba sira neebe la halo parte ona hierarkia militar, bele hetan asesu ba postu honorífiku, nuudar Jeneral ka Almirante, kargu Xefe Estadu-Maior Jeneral Forsas Armadas kaer husi Tenente-Jeneral; kargu Vise-Xefe Estadu-Maior Jeneral Forsas Armadas husi Major-Jeneral no kargu Xefe Estadu-Maior Forsas Armadas husi Brigadeiru-Jeneral, no tempu mandatu ba XEMJFA no Vise-XEMJFA hanaruk ba tinan lima, neebe bele hatutan dala ida de’it ho tempu hanesan.

Aleinde promosaun sira-nee, importante tetu didiak oinsa karreira militar halo progresaun, liu husi mekanizmu hirak neebe regula atu fo dalan ba ida-idak nia hakarak no asegura ekilibriu adekuadu ba iha estrutura militar FALINTIL-Forsas Defeza Timor-Leste.

“Ita presiza adapta kuadrus FALINTIL-Forsas Defeza Timor-Leste tuir organizasaun nia nesesidade estrutural sira, liu husi revizaun ida ba efetivu kuadru permanente sira, integra ka lae, iha estrutura organika FALINTIL-Forsas Defeza Timor-Leste. Ita presiza hanoin klean atu nunee instituisaun sira bele tetu hikas fali konaba sira nia knaar iha tempu foun ohin loron nian, nakonu ho dezafius no mudansas relasiona ho paradigma seguransa nian,” katak aman ba nasaun nee.

Lú Olo mos hatutan, vizaun forsa armadas nia neebe mak prontu no ho naran morin hodi servi Timor leste no seguransa ema hotu hotu nia.

Nunee mos Komadante Falintil Forsa Defeza Timor Leste (F-FDTL) Lere Anan Timur ba jornalista hatutan ohin loron neebe mak espesial ba Forsa Defeza Timor leste tanba estadu fo komfiansa ba sira.

“Ita hotu hatene katak loron neebe mak espesial ba Forsa Defeza Timor Leste nia dala ida tan Estadu Governu fo konfiasa ba ami nain hira ba hau Xefe Estadu Maior Jeneral nafatin ho postu Tenente Jeneral, hau nia Vice Falur Rate Laek ba posto Major Jeneral, ba hau nia Xefe Estado Maior Coliati ho Postu Brigadeiru Jeneral, no pedro klamar fuik ho posto Komodoro,” hatete Lere.

Komandante sira neebe mak hetan promosaun husi dekreta promosaun Coronel Calisto Santos Coli ‘Coliati’ ba postu Brigadeiru Jeneral, Kapitaun Mar e Guerra Donaciano do Rosário da Costa Gomes ‘Pedro Klamar Fuik’ ba postu Komodoro, Brigadeiru-Jeneral Domingos Raul ‘Falur Rate Laek’ ba postu Maior-Jeneral, no Maior-Jeneral Tito da Costa Cristovão ‘Lere Anan Timur’ ba Tenente-Jeneral.

Iha fatin hanesan Prezidente CNJTL, Maria Dadi Magno mos lori organizasaun nia naran hatoo parabens ba instituisaun F-FDTL neebe mak hetan ona promosaun.

“Lori organizasaun nia naran hatoo parabens ba instituisaun F-FDTL hakarak ka lakoi nasaun tenke ba oin, nasaun foin primeiru vez, estadu rekoinese atu fo deviza ba ita nia jeneral, sira ita nia estadu ida nee, no foin primeiru vez mos espasu ida ba orgaun luta husi klandestina nia pasu ba iha kareira,” dehan nia.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here