PR Lakon Asesor Diak Husi Palasiu

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guterres Lú Olo sente lakon asesor diak tebes ida husi Palasiu Prezidente, maibe iha sorin seluk governu manan ema ida integru dedikasaun no efisiente.

Prezidente Republika Francisco Guterres Lú Olo hatoo kestaun nee liu husi nia diskursu bainhira fo tomada de posse ba Ministru Finansas Rui A. Gomes iha Palasiu Prezidente, Bairru Pite, Segunda (23/11/2020).

“Ohin, Prezidente Republika lakon asesor diak tebes ida maibe iha sorin seluk, Governu manan ema ida neebe integru, dedikadu no efisiente, manan ekonomista interdixiplinar espesializadu iha dezenvolvimentu, ho esperiensia profisional liu tinan rua nulu,” hatete PR Lú Olo.

PR rekonese ba servisu no kualidade exelente no dedikasaun estraordinariu husi Rui Gomes durante periodu neebe nia halao kna’ar nuudar asesor pesoal Prezidente Republika.

“Hau remata ho deseju katak hau nia amigu Rui Gomes sei hetan susesu boot iha nia misaun foun servi patria libertada Timor Leste,” dehan nia.

Aman nasaun nee mos sauda Rui Gomes neebe too ohin halao knaar asesor Prezidente Republika tanba simu responsabilidade hatoo husi Primeiru Ministru Taur Matan Ruak.

“Hau sauda Rui Augusto Gomes, neebe too ohin, halao knaar nuudar asesor Prezidente Republika, tanba simu reponsabilidade hatoo husi Primeiru-Ministru, Jeneral Taur Matan Ruak, tuir dalan Konstituisaun haruka,” hatete Lú Olo.

Aman nasaun nee hatutan ho konfiansa tomak no esperansa katak dezempenu finanseiru no ekonomiku husi Govemu no setor publiku en-jeral sei hadiak liutan, mak Xefe Estadu deside nomeia Rui Gomes nuudar Ministru Finansas.

Nomeasaun Rui Gomes nian ba Ministru Finansas sai efeitu liu husi Dekretu Prezidensial numeru 68/2020, publika ohin iha Jomal Republika.

Haktuir nomeasaun nee mak Xefe Estadu foin fo pose liu ba. Signifika katak Ministru Finansas foun hahu ninia knaar husi ohin ba oin, husi loron neebe nia simu pose husi Prezidente Republika.

Rui Gomes sei kaer knaar mamuk neebe husik hela husi Ministru Finansas uluk, Fernando Hanjam, neebe husu ezonerasaun tanba kestaun saude.

Prezidente Republika simu ninia pedidu ezonerasaun no sai efetivu liu husi Dekretu Prezidensial numeru 67 /2020, hahu ohin, 23 novembru 2020.

Prosesu ezonerasaun no nomeasaun ba membru Governu husi Prezidente Republika, hafoin simu proposta husi Primeiru-Ministru, haktuir artigu 86 alinea h) no artigu 106 númeru 2. husi hotu Konstituisaun Republika.

“Iha okaziaun ida nee, ha’u hakarak dezeja ba Dr. Hanjam atu rekupera lalais ninia saude hodi bele halao fila fali ninia knaar profisional, ba ninia benefisiu rasik, famíilia nian no ba mos ba ita-nia Povu no ita-nia País. Iha 30 outubru 2017, hau nomeia no fo pose ba Dr. Rui Gomes nuudar Ministru Planu no Finansas VIl Governu, lidera husi Dr. Mari Alkatiri. Iha períodu neebe nia lidera Ministeriu kompleksu nee, nia halao ho kompetensia no lideransa ezemplar no kaer metin duni jestaun efikás ba finansas publikas iha situasaun ida neebe difisil no nakonu ho limitasaun tanba bele deit uza rejime duod esimal. Ita iha espetativa boot tebes katak Dr. Rui Gomes, liu husi ninia knaar nuudar Ministru Finansas, sei husik marka pozitiva no ezemplar ba VIII Governu no ba ita-nia País,” hatutan nia.

Iha fatin hanesan, Primeiru Ministru (PM) no Ministru Interior (MI) Taur Matan Ruak kongratula Rui Gomes no deseja no susesu iha nia mandate.

“Agradese ba Vise MF Sarah Lobo Brites neebe durante nee asume knaar hotu MF nian. Kontinua servisu hamutuk ho MF Rui Gomes neebe iha konesimentu klean kona-ba funsionamentu diak,” katak Taur.*

Reportajen: Emerencian Pinto
Editor: Ekipa STL

LEAVE A REPLY

Please enter your comment!
Please enter your name here