PR lansa Livru Buibere Ukun Rasik Aan

DILI, STLNEWS.co – Prezidente Republika Francisco Guterres Lu Olo lansa Livru Buibere Hamriik Ukun rasik aan.

Iha Lansamentu nee Prezidente Republika Francisco Guterres Lu Olo liu husi Diskursu Iha Palasiu Prezidente Bairru Pite Kinta kalan (10/06/2021) hatete ho laran haksolok Ohin PR lansa Livru istoria Feto nia.

“Ho laran-ksolok tebes no orgullu boot mak hau lansa ohin obra importante ida, laos deit ba ita-nia feto asuwain sira, maibe ba mos ita hoto hotu, jerasaun ohin nian no aban bairua nian.” Hatete PR.

PR hatete Livru sura istoria luta barani feto sira-nian lansa iha Palasiu Prezidensial Nicolau Lobato asosia ho data importante tebes ida, iha Luta Libertasaun Nasional levantamentu Marabia, iha 10 juñu 1980.

“Husi ita-nia istoria rasik, mak ita bele hasai lisaun oioin ba ita-nia moris ohin loron no ba abanbairua. Istoria sura iha livru Buibere Hamriik Ukun Rasik An haree ba pasadu ida neebe nakonu ho barani, determinasaun no dedikasaun, maibe ho mos halerik oioin neebe sei hakanek hela sobrevivente sira.” Hatete Lu Olo.

Xefe Estadu hatutan Livru nee mai husi inisiativa Organizasaun Popular da Mulher Timor (OPMT), nuudar organizasaun massas FRETILIN nian, maibe reflekte feto hothotu ninia kontribuisaun ba luta, husi tinan 1974 too 1999.

Ho kontestu koletivu ida nee mak Líder Istoriku hotu hotu fo apoiu total no inkondisional, hahu ho festa angariasaun fundus iha tinan 2010 no hetan mos apoiu finanseiru husi Gabinete Primeiru-Ministru.

Organizasaun oioin, maluk timoroan no belun barak tebes, inklui emprezariu sira, hatan ho apoiu diak tebes ba inisiativa ida nee.

“Ho haksolok boot mak hau haree katak ekipa hothotu, harii ba produsaun livru nee, kahor feto ho mane, jerasaun tuan ho jerasaun foin-sae. Dalan ida nee permite fahe esperiensia no tau hamutuk matenek ida-idak nian, husi jerasaun oioin no konsege duni produs obra koletiva ida neebe sura no interpreta Istoria Luta Libertasaun Nasional ho perspetiva timoroan sira-nian, ho apoiu husi ita-nia belun boot tolu, ho fuan timor Nugroho, Titi no Kelly Silva.” Dehan nia.

Aman Nasaun nee hatutan Obra ida nee mak foin fo-sai ba dahuluk, no klean tebtebes, saída loos mak feto Timo oan sira halo ho barani, nuudar indivíduu ka liuhusi organizasaun polítiku-partidaria ka lae, husi 1974 too 1999, iha rai-laran no iha rai-liur.

Nunee mos Peskisa e Elaboração da Historia da Luta da Mulher Timor Nunu Rodrigues hatutan Honra boot atu reprezenta Comissão de Pesquisa e Elaboração da História da Luta da Mulher Timor, hamriik iha nee, hamutuk ho maluk sira hotu komemora loron istoriku, Levantamentu Marabia, 10 juñu, hodi lansa livru Buibere Hamriik Ukun Rasik An.

“Lori Comissão nia naran, ami hakarak agradese ba OPMT neebe fo oportunidade atu envolve iha obra koletiva ida nee produs livru Buibere Hamriik Ukun Rasik An. Ami hotu neebe envolve iha Comissão hetan previleju boot ida tanba ami bele rona diretamente husi asuain sira nia sasin kona-ba luta libertasaun nasional, tanba ema barak la hetan oportunidade ida nee.” Hatete Nunu.

Comissão de Peskiza e Elaboração da História da Luta da Mulher Timor harii husi OPMT ho natureza inkluzivu atu halibur peskizador foin-sae no hakerek-nain, la haree husi kor polítiku, ho koletivamente halibur dadus no hakerek istoria luta feto hotu-hotu ninian husi 1974-1999, laos istoria luta OPMT nian mesak.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Harii Federasaun Tenke Prepara Kondisaun

DILI, STLNEWS.co - Sekretariu Estadu Juventude No Desportu (SEJD), hatete harii federasaun tenke prepara mos kondisaun hanesan tenke iha atleta no treinador rasik. Lia hirak...

SEJD Enkontru Ho Lider Artemarsiais

DILI, STLNEWS.co - Sekretariu Estadu Juventude no Desportu (SEJD), halao enkontru ho lider artemarsiais sira iha Timor Leste, kona ba rekezitus artemarsiais nian neebe...

Lori Maromak Nia Domin Ba Ema Hotu

DILI, STLNEWS.co - Nuudar sarani neebe diak iha moris, tenke sai valeta ba ema hotu, atu lori Maromak nia grasa no domin ba maun...
%d bloggers like this: