PR Loke Premiu Ba Publiku

Prezidensia Republika loke premiu Direitus Umanus “Sergio Vieira de Mello”, edisaun XIII ba sidadaun no organizasaun sira iha rai laran. (Foto: Media PR)

DILI, STLNEWS.co – Prezidensia Republika loke premiu Direitus Umanus “Sergio Vieira de Mello”, edisaun XIII ba sidadaun no organizasaun sira iha rai laran.

Liu husi komunikadu imprensa neebe STL asesu husi midia PR, Kuarta (21/10/2020) hatete sidadaun no organizasaun sira neebe dedika nia an ba promosaun, protesaun no divulgasaun direitus umanus iha Timor-Leste bele aprezenta nia kandidatura husi 19 Outubru-18 Novembru 2020.

Anualmente Prezidente Republika atribui Prémiu Direitus Umanus “Sergio Vieira de Mello” iha 10 dezembru, loron Internasional ba Deklarasaun Universal Direitus Umanus, nuudar rekoñesementu Estadu nian ba kontribuisaun husi sidadaun timoroan ka rai-liur, organizasaun governamental no la-governamental sira ba promosaun, protesaun no divulgasaun Direitus Umanus iha Timor-Leste.

Sidadaun no organizasaun sira tuir komunikadu imprensa nee katak, neebe promove, proteje no divulga direitus umanus bele aprezenta ninia kandidatura hodi manán Prémiu nee, ho valor osan US $ 10,000 (Dolár amerikanu rihun-sanulu) ba manan-nain iha kategoria ida-idak.

Komunikadu imprensa nee mos sita premiu Direitus Umanus sei fahe ba kategoria Direitus Sivis no Polítikus ba individu ka organizasaun sira neebe sai defensor ba direitus umanus no Direitus Sosiais, Ekonomikus no Kulturais ba individu ka organizasaun sira neebe dedika nia an ba promosaun atividades direitus umanus iha areas Direitus Sosiais, Ekonomikus no kulturais, nomeadamente ba kombate pobreza, edukasaun, saude, protesaun meiu ambiente no solidariedade sosial.

Kritéieu ba aprezentasaun kandidatura mak individu labele kandidata-an rasik, kada proponent bele aprezenta kandidatura ida deit, ema ka instituisaun neebe manán tiha ona Prémiu nee iha tinan-5 kotuk labele sai kandidatu, aprezentasaun kandidatura hakerek iha lian tetun ka portugés.

Prémiu Direitus Umanus “Sergio Vieira de Mello”, harii husi Dekretu-Lei númeru 15/2009, 18 marsu, atribui husi Prezidente Republika, ho objetivu destaka atividade sidadaun timoroan no rai-liur, organizasaun governamentais no la-governamentais iha promosaun, defeza no divulgasaun Direitus Umanus iha Timor-Leste.

Iha tinan-2019, Xefe Estadu atribui Prémiu Direitus Umanus “Sergio Vieira de Mello” ba manan-nain ho kategoria Direitus Sosiais, Ekonomikus no Kulturais ba José Amaral Guterres, Marcelina dos Santos Cruz no Organizasaun Konservasaun Flora no Fauna (KFF). Manan-nain ba kategoria Direitus Sivis no Polítikus mak José Luís de Oliveira no Virgillio da Silva Guterres “Lamukan.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here