PR Presta Omenajem Ba Saudozu Buka Tuir

Prezidente Republika Francisco Guterres Lú Olo (Dok. STL)

DILI, STLNEWS.co – Prezidente Republika Francisco Guterres Lú-Olo presta omenajen ikus ba saudozu João Francisco de Fátima “Buka Tuir” neebe hakotu iss Ohin madrugada tuku 05:00 iha Ospital Nasional Guidu Valadares.

PR dehan ohin loron triste boot, tanba Timor-Leste lakon tan ema diak ida no komandante diak ida iha komponente Naval nian.

“Ohin ita lakon familia ita, ita-nia komandante boot ida husi marina nian, entaun ami mai hatoo sentidu pezamus ba familia ba familia sira hotu, forsa no ami hatoo katak momentu nee susar no todan boot ida nee ami mai partilla ho familia sira,” dehan PR Lú-Olo iha matebian Buka Tuir nian iha Farol, Dili, Kinta (22/10/2020).

Xefe Estadu dehan, saudozu ema neebe pasiensia no nunka kontra nia komandante sira. atu siak oinsa mos nunka hatan, halo servisu nonok deit husi ai-laran too vila laran.

Nunee mos konaba fen no oan nain haat neebe hela, lei proteze sira no lei iha hodi tau matan.

Saudozu Kapitaun Fragata João Francisco de Fatima “Buka Tuir” moris iha suku Loi-Huno Postu Administrativu Ossu, Munisípiu Vikeke iha loron 10 de Outubro de 1969, oan husi Antonio da Costa Guterres Fatima no Clementina da Costa.

Saudozu hakotu is iha ONGV ho idade 51, iha oras 05:00 madrugada tamba moras komplikadu. Saudozu husik hela fen kaben ho oan nain haat, mane nain rua no feto nain rua.

Saudosu hahu inkorpora iha Instituisaun F-FDTL iha 02 de Fevereiru 2001 iha batallaun primeiru. Iha loron 21 Juñu 2001 saudozu promove ba Tenente. Iha tinan 2002 saudosu kolaka iha CICNL nu’udar Instrutor. Iha 16 Dezembru 2005 saudosu promove ba Primeiru Tenente. Iha 25 Junu 2007, saudosu koloka iha komponente Naval nuudar segundo Komandante Naval.
Iha 07 Abril 2012 saudosu promove ba Capitun Tenente no iha 19 Novembru 2018 saudosu koloka nafatin iha Komponenete Navál nu’udar mós segundu komandante Navál. Iha 13 Abril 2015 saudozu koloka fali iha Kuartel Jeneral sai hanesan Xefe Divisaun CENOP.

Iha 02 Fevereiru 2020 promove ba Kapitaun Fragata, saudosu koloka nafatin iha Kuartel Jeneral nu’udar Xefe Divisaun J6. Durante nia servisu, saudozu komesa hetan moras neebe ke afeta ba nia saúde. Nee duni halo saudozu fraku no konsege ba halo tratamentu iha Singapura, maibé meiu hirak nee la konsege hanaruk saudosu nia vida, too ohin saudozu hakotu nia iss.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here