PR Promulga Dekretu Lei Medidas Apoiu Familia

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika Francisco Guterres Lú Olo promulga dekretu lei konaba medidas apoiu ba familia.

Liu husi komunikadu neebe mak STL asesu husi media PR, Tersa (06/10/2020) lokraik nee hatete Prezidente Republika, Francisco Guterres Lú Olo, promulga Dekretu-Lei kona-ba medidas apoiu ba famílias, liuhusi atribuisaun “sesta bázika”, ba operadores ekonomikus lokais, iha ambitu planu rekuperasaun ekonomiku, no kria rejime espesial aprovizionamentu ba efeitu.

Dekretu-Lei nee regula kona-ba mekanismu no kondisoins ba implementasaun medidas apoiu ba familias, liu husi atribuisaun sestas bazikas, hanesan produtores agrikolas no operadores komersiais ba produtus alimentares no ijiene pesoal, nasionais no lokais, ho perspetiva estimulasaun ekonomiku ba kurtu prazu no insentiva produsaun no komersiu iha nível lokal no nasional.

Sesta bazika kompoin husi ai-han esensial no produtus ijiene ka voucher sosa nian neebe koresponde sasan ho valor hanesan hodi envolve produtores agrikolas, produtores no operadores komersiais, membru ida-idak iha uma kain neebe sei hetan apoiu no rejista iha Livru Rejistu Uma Kain too 11 maiu 2020.

Sesta bazika sei fahe ba membru ida-idak iha uma kain sira iha fulan novembru no dezembru 2020.

Montante ba sesta bazika mak ho valor $25 ba membru ida-idak iha uma kain ba kada fulan, ba fulan rua nian.

Implementasaun medidas apoiu ba família sei lidera husi Ministru Koordenador ba Asuntu Ekonomikus neebe koopera ho servisu publiku relevante no instituisoins laós Administrasaun Publika ninian.

Membru Governu neebe responsavel ba area saude sei halo validasaun ba lista produtus atu hatene ninian nutrisaun no sanitariu husi kada produtu ai-han.

Membru Governu neebe tau matan ba area administrasaun estatal sei serbisu hamutuk ho autoridades no administrasoins munisipais no sukus ba elaborasaun lista xefe família no numeru total ba membru uma-kain neebe sei sai benefisiáriu no organiza ninia distribuisaun.

Membru Governu neebe responsabiliza ba area solidariedade sosiál no inkluzaun disponibiliza rede nasionál no sentru solidariedade sosial iha munisípiu sei apoiu distribuisaun sesta bázika.

Konsellu Ministru aprova diploma nee iha 23 setembru 2020 iha ambitu Planu Rekuperasaun Ekonomika tuir Rezolusaun Governu numeru 28/2020, 19 agostu.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here