PR Promulga Lei Prevensaun Kombate Korrupsaun

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika (PR) Francisco Guterres Lú Olo, promulga Lei Medidas Prevensaun no Kombate Korrupsaun.

Liu husi komunikadu imprensa ne’ebé mak STL asesu iha Segunda (24/08/2020), liu husi Media PR hatete Prezidente Republika, Francisco Guterres Lú Olo, ohin loron, promulga Lei Medidas Prevensaun no Kombate Korrupsaun.

Promulgasaun Lei Medidas Prevensaun no Kombate Korrupsaun sei hametin liu tan fiar publiku ninian ba instituisaun sira ne’ebé estadu harii. Atu nune’e, ba oin, implementasaun lei ne’e sei hametin fila fali fiar sidadaun nian ba integridade, transparensia, efisiensia, efikasia instituisoins estadu nian hodi servi ba interese publiku.

Iha karta ba Parlamentu Nasional, Prezidente Republika hateten: “Prevensaun no kombate kontra korrupsaun laos deit liu husi aprovasaun lejislasaun no montajen sistema ba institusoins ne’ebé nu’udar nukleu sentral. Importante tebes prevensaun no kombate korrupsaun atu insituisoins funsiona efetivamente, tuir prinsípiu legalidade, izensaun, transparensia, efisiensia, efikasia, simplisidade no previsibilidade ba prosedimentus; no mos iha partisipasaun husi atores prinsipais, inkui instituisoins profisionais no sidadaun, iha area no prosedimentu ho finalidade atu servi interese publiku.” dehan PR

Prezidente Republika apela ba Governu no Parlamentu Nasional atu apoia Komisaun Anti-Korrupsaun, Prokuradoria Jerál Republika, Polísia Sientífika no Investigasaun Kriminal no Tribunal Rekursu hetan meius nesesariu atu kombate korrupsaun ho efetivu, liu husi atribuisaun Orsamentu Jeral Estadu hodi permite iha rekursu umanus espesializadas, tekniku no finanseiru sira, atu susesu iha misaun komplexu ida ne’e iha luta kontra korupsaun no krime organizadu.

Prezidente Republika iha ninia karta ba Parlamentu Nasional hateten katak implementasaun lei ba Prevensaun no Kombate Korrupsaun, atu iha impaktu efetivu no alargadu, lei ne’e rasik presiza fali regulamentasaun komplementar, liu husi dekretu-lei no dekretu sira seluk, liuliu relasiona ho área vulneravel sira iha verifikasaun korrupsaun no konflitu interese ninian.

Parlamentu Nasional, iha loron 20 fulan Jullu 2020, aprova Lei Medidas Prevensaun no Kombate Korrupsaun ho unanimidade ho votus 61.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here