PR: Rekoinese No Valoriza Kontribuisaun Igreja Katolika

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika Francisco Guterres Lú Olo lori estadu nia naran rekoinese no valoriza Igreza Katolika nia kontribuisaun durante nee.

PR Lú Olo hatoo kestaun nee liu husi nia mensajen neebe mak lee husi Xefe Casa Sivil Francisco Maria De Vasconcelos ba selebrasaun Aniversariu Diosege Dili Arquidiocese ba dala ualu nulu, Tersa (08/12/2020).

PR hatete nia agradese konvite husi Dom Virgílio do Carmo da Silva no Amo Padre Guilhermino da Silva, Prezidente Komisaun Organizadora, atu hakaat ba Se Catedral Dili, nuudar Prezidente Republika, atu selebra hamutuk loron importante ida ba istoria Diocese Dili nian, ba Igreja Katolika tomak no ba mos Povu Timor-Leste.

“Tanba moras mak hau labele marka prezensa maibe hakarak hatoo lia menon ba serimonia importante ida nee ho Estadu Timor-Leste nia naran. Ho haksolok boot mak Prezidente Republika, ho Estadu nia naran, rekonese no valoriza kontribuisaun boot husi Igreja Katolika neebe halao ninia misaun evanjelika hamutuk ho edukasaun no formasaun ba timoroan sira.” Gatete PR Lu Olo.

PR hatutan husi eskola katolika sira, hahu husi ensinu pre primariu too fali eskola profesor katekista, eskola Profesores Posto Eng Canto Resende, no husi Colegio de São José/Dare, Colégio de Santo António/Lahane, Escola de Artes e Ofícios, Colégio Imaculada da Conceição no Colégio Nuno Alvares, iha Soibada, Colégio de S. Isabel, iha Manatuto, no Colégio de Santa Terezinha, iha Viqueque, no mos husi Seminariu sira, mak maioria timoroan sai matenek-nain, iha area oioin.

Liu husi instituisaun sira ne e mak maioria líder-sira iha rezistensia Timorense simu edukasaun no mos formasaun kona-ba moral no életika.

Instituisaun sira nee kontribui makaas ba hasae kbiit ba ema sira neebe kaer ona ka sei kaer hela knaar importante iha orgaun estadu nian, entidade púlublika no privada no iha fatin sira seluk, iha Timor-Leste livre no independente. Nunee tenke hahii knaar Igreja Katolika-nian iha areea edukasaun no mos iha formasaun karkter Ema Timor-nian.

“Ohin, ita labele haluha hahii mos temi aten-barani no tuba rai metin husi Igreja Katolika atu kaer metin lia-tetun nuudar meiu prinsipal komunikasaun entre sarani sira durante okupasaun indonezia. Ho liturjia iha lia-tetun, Igreja Katolika ajuda haburas no hametin aspetu kultural boot ida no, nunee ajuda rezistensia Timorense hatudu ba mundu katak ita timoroan iha duni identidade rasik. Relijiaun Katolika no lian Portugés, neebe .isionariu Katoliku sira lori mai ita-nia rai, sai mos parte integrante ba ita-nia identidade nuudar Timoroan, neebe halo ita la hanesan ho povu sira seluk, iha ita-nia rejiaun.” Hatete Lú Olo.

Xefe Estadu hatutan imolok invazaun no okupasaun Indonezia maioria povu Timor-Leste halao pratika animista. Fiar-nain Katoliku sei minoria hela bainhira militar Indonéziu tama rai laran iha 7 dezembru 1975.

Ho hanoin katak ho tauk mak bele kontrola lalais liu povu Timor-Leste, militar Indoneziu sira tama kedas ho pratika abuzu oioin, inklui halo persegisaun, tortura no oho Timor Oan liuliu sira neebe defende ukun rasik-an.

Padre no madre barak mak hamriik kedas hasoru abuzu direitus umanus no barak mak identifika-an nuudar defensor ideal ukun rasik-an, liu husi hahalok oioin. Ho sira-nia hahalok fo mahon, hahavn no ai-moruk, eduka no proteje Povu, padre no madre sira hamorin babeibeik Igreja Catolika Timor -Leste nia naran, nuudar instituisaun ida neebe sempre hamriik iha Povu Timor-Leste nia sorin.

Aman nasaun nee hatutan, importante fo-hanoin ohin lalaok boot ida neebe akontese iha 13 Outubru 1981 husi responsavel masimu Igreja Katolika Timor-Leste. Durante selebrasaun Misa Kampal iha Lecidere, Díli, husi Administrador Apostoliku Dom Martinho da Costa Lopes, ho espíritu Kristu-nian, ho barani no koerensia, publikamente denunsia movimentu boot tebes ida, husi militar indoneziu, hanaran ‘’Operasaun Kikis’, neebe iha objetivu atu hamoos tiha Rezistensia Timorense.

“Iha 6 Fevereiru 1989, Dom Carlos Filipe Ximenes Belo barani hakerek ba Sekretariu-Jeral ONU no husu referendu ba Timor-Leste ho espíritu rezistensia Timorense nian “Ami mate dadaun ona, nuudar povu no nasaun”. Apelu ida nee monu ba kristaun sira-nia laran iha nasaun barak no nunee ajuda Frente Esterna hala’o vservisu hodi hasa’e solidariedade internasional ho Povu Timor-Leste. Lalaok boot seluk ida tan, husi Igreja Katolika, akontese iha 12 outubru 1989, bainhira Amu Papa João Paulo II vizita Timor-Leste no deside fo-sai informasaun kona-ba situasaun iha rai-laran ba meius komunikasaun mundu tomak nian. Hahalok ida nee hatudu momos ona katak Igreja katolika lakoi Povu Timor-Leste halerik tan.” Dehan Lú Olo.

Lú Olo hatutan rekonesimentu internasional ba knaar Igreja Katolika nian iha Timor-Leste akontese iha 1996 bainhira Bispo Dom Carlos Filipe Ximenes Belo simu Premiu Nobel da Paz hamutuk ho Dr. Jose Ramos-Horta.

Tanba hahalok sira nee hotu, neebe hatudu katak responsevel katoliku sira identifika-an ho povu, mak lori maioria animista hili relijiaun Katolika durante okupasaun Indonezia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here