PR Sei Haruka Pedidu Estensaun EE Da-11 Ba PN

Xefe Kasa Sivil, Francisco Maria de Vasconcelos. (Foto: Media PR)

DILI, STLNEWS.co – Prezidente Republika, Francisco Guterres Lú Olo posibilidade sei haruka pedidu estensaun Estadu Emerjensia dala-11, ba Parlamentu Nasional hodi diskute.

Kestaun nee hatoo husi Xefe Kasa Sivil, Francisco Maria de Vasconcelos ba jornalista bainhira PR remata enkontru ho Konsellu Estadu no Konsellu Superior Defeza No Seguransa, iha Palasiu Prezidente Nicolau Lobato, Bairru Pite, Dili, Kuarta (24/02/2021).

“Prezidente halo enkontru ho Konsellu Estadu no Konsellu Superior Defeza No Seguransa, Konsellu rua nee rekomenda ba Prezidente Republika, atu hatoo pedidu ba Parlamentu Nasional hodi halo estensaun ba Estadu Emerjensia, neemak rekomendasaun fo ona ba Prezidente ohin ou aban PR sei haruka pedidu Governu nian ba Parlamentu Nasional, hodi deskute no aprova depois mak Prezidente bele dekreta.” hatete Xefe Kasa Sivil nee.

Xefe Kasa Sivil hatutan, medidas nafatin hanesan uluk so iha tan ida mak husi forsa defeza para fo apoiu ba servisu neebe iha fronteira. Konaba atu halo suspende ba eskola, Xefe Kasa Sivil hatete ida nee sei diskute, depois Parlamentu Nasional aprova mak bele aplika.

“Ida nee sei diskute depois Parlamentu Nasional aprova tiha, depois mak governu halo dekretu ida, para halo medida saida mak bele aplika iha teritoriu tomak, inklui ba munisipiu rua ho rejiaun espesial,” katak nia.

Entretantu iha loron 19 fulan Fevereiru, Governu liu hosi reuniaun Konsellu Ministru, deside no husu Prezidente Republika (PR), Francisco Guterres Lú Olo halo tan estensaun ba Estadu Emerjensia (EE) ba-dala-11 no suspende atividade eskola.

Ministru Prezidensia Konsellu Ministru, Fidelis Leite Magalhães hatete, governu foti desizaun nee, tanba haree ba numeru Covid-19 iha país vizinu Indonezia no iha rai laran kontinua aumenta, tanba nee iha proposta governu haruka husu mos atu suspende hotu atividade eskola iha rai laran, karik Prezidente Republika aseita proposta nee.

Atu renova Estadu Emerjensia ba dala 11, tuir pedidu husi governu, Prezidente Republika ohin konsulta ho Konsellu Estadu no Konsellu Superior Defeza no Seguransa, atu rona hanoin ida-idak husi orgaun konsultivu nee kona-ba renovasaun Estadu Emerjensia, tuir artigu 85, alínea g) Konstituisaun RDTL.

Estensaun EE ba dala 10 nia valida ba loron 30, hahu iha loron 3 Janeiru 2021, no termina iha dia 1 Fevereiru 2021.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here