PR: Tinan Nee Nakonu ho Dezafius

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guteres Lú Olo, informa loron ohin ikus ona ba tinan 2020 nian, maibe nakonu tebes ho dezafius oioin.

“Ohin mos loron ikus tinan 2020 nian. Tinan ida ne’e lao nakonu ho dezafiu oioin. Laos deit Covid-19 mak preokupa ita, maibe, ita hasoru mos dezastre natural no impase politiku,” dehan PR ba jornalista sira iha Palasiu Prezidente Bairu Pite, Dili Kinta (31/12/2020).

Situasaun sira nee hotu afeta ba sosiedade no ba ekonomia maske nunee ezije husi ema hotu atu moris ho laran hakmatek, responsabilidade, seriedade no reziliensia hodi bele hakaat liu dezafiu sira nee.

“Ho barani no determinasaun mak ita koalia ba malu no buka-hetan dalan atu rezolve dezafiu sira nee hotu, nuudar familia boot ida,” dehan nia.

Ho esforsu hotu hotu nian, liuliu husi pesoal linha da frente, too ohin-loron, sira seidauk rejista moras nee daet ba komunidade no ema ida la mate tanba Covid-19.

Nia dehan, iha estabilidade politika no sosial no moris iha dame nia laran. Instituisaun estadu nian funsiona hela no VIII Governu Konstitusional ukun hela ho estabilidade no apoiu. Maibe estabilidade en-jeral mai husi povu-nia maturidade politika no komprensaun ba situasaun hotu-hotu neebe akontese iha rai doben.

“Hau nia parabens no apresiasaun boot ba sidadaun hot-hotu tanba, ho reziliensia, responsabilidade no laran-hakmatek, akompaña no ajuda estadu hodi bele hetan estabilidade.

Hau nia parabens no apresiasaun boot ba pesoal tomak husi Ministeriu Saude, instituisaun Defeza no Seguransa no husi entidade publika relevante sira neebe servisu makaas,” dehan nia.

Reportajen: Efizenia da Costa
Editor: Ekipa STL

LEAVE A REPLY

Please enter your comment!
Please enter your name here