PR: TL Hasoru Luta Naruk Mak Hetan Indepedensia

DILI, STLNEWS.co – Prezidente Republika (PR) Francisco Guterres Lú Olo hatete, bainhira deklara indepedensia ba iha loron 28 fulan Novembru 1975, povu Timor Leste hasoru luta naruk ida neebe mak nakonu ho terus.

Prezidente Republika hatoo kestaun nee ba jornalista liu husi nia mensajen iha Loron Selebra Restaurasaun Indepedensia Timor-Leste 20 Maiu 2021 iha Palasiu Prezidente, Bairru Pite, Kinta (20/05/2021).

PR hatete, ohin loron selebrasaun loron 20 fulan Maiu tinan 2002, tinan sanulu resin sia liuba, iha komunidade internasional nia oin, Timor leste restaura nia indepedensia, nunee maski ohin loron hasoru hela Covid-19 nian, neebe daet ona iha munisípiu hotu-hotu no iha RAEOA, Prezidente Republika hakarak konvida sidadaun hotu atu halo refleksaun ida kona-ba TL nia perkursu ka dalan neebe lao ona, nuudar povu no nasaun ida.

“Loron sia hafoin ita deklara ita-nia indepedensia iha 28 Novembru 1975, ita hasoru luta naruk ida neebe nakonu ho terus oin-oin durante tinan rua nulu resin haat nia laran. Situasaun neebe ita hasoru iha tempu neeba obriga ita atu adapta lalais ba realidade neebe ita hasoru no ita konsege organiza an ho meius neebe iha, hodi hasoru no hakaat liu dezafiu no terus hotu-hotu.” hatete PR

Xefe Estadu hatutan, hahu ho rezistensia armada iha ai-laran, estende ba sidade laran, no ba esterior, ka rai-liur. Iha tempu neebe joven Timor oan hahu sai ba eskola iha Indonezia lori mos rezistensia ba iha neeba hodi forma movimentu rezistensia estudantil no atrai mos solidariedade husi demokrata Indoneziu sira.

Ho Frente tolu – Frente Armada, Frente Klandestina no Frente Esterna/Diplomatika – maka Timor Leste forma rezistensia ida deit husi povu Timor-Leste hodi manan funu naruk ida, nakonu ho dezafius, terus no mate, no ikus restaura indepedensia iha serimonia iha Tasi-Tolu, loron 20 fulan Maiu tinan 2002.

“Kompatriota sira povu doben ohin loron, nuudar povu no nasaun ida, ita hasoru dala ida tan, dezafiu boot ida neebe lori mai ita insertezas no terus barak. Pandemia Covid-19 neebe afeta mundu tomak no daet lalais los husi ema ba ema no husi pais ida ba país seluk, hahu iha fulan Dezembru tinan 2019. Vírus corona daet ona ba ema liu tokon atus ida neen nulu, no too ohin loron hasai ona ema nia vida, liu tokon tolu.” dehan Lú Olo.

Aman nasaun nee mos hatutan, iha Timor Leste halo ona esforsu barak hodi evita vírus corona daet ba sidadaun sira. Biar nunee, ohin loron tama ona ba kategoria transmisaun komunitaria, iha munisipiu Díli. Ema neebe hetan pozitivu ho virus Covid-19 nian too ona 4.949, sura husi 21 marsu 2020 too 19 Maiu 2021. Kazu ativu iha 19 Maiu 2021 hamutuk hotu 2.302, no lakon belun nain sanulu resin ida neebe mate ho corona virus.

“Husi ezemplu neebe ita asiste iha país seluk, iha ita-nia rejiaun no iha kontinente hotu-hotu, ita tenke iha konxiensia katak Covid-19 sei la lakon iha tempu badak. Nunee, ita tenke adapta no aprende moris ho situasaun ida nee.” katak nia.

Aman nasaun nee mos hatutan labele haluha mos dezastre naturais neebe akontese iha fulan kotuk 4 de Abril. Udan boot rezulta bee sae makaas no provoka inundasaun iha munisípiu Dili no mos iha munisipiu seluk hanesan Manatuto, Baucau, Viqueque, Covalima, no seluk tan. Ho inundasaun no ho forsa bee nian infraestrutura barak mak monu no estraga total, hanesan ema nia uma, edifísiu publiku, no infraestrutura bazika publika barak hanesan dalan no pontes.

Ema barak lakon sira nia uma no sasan tomak, no too ohin loron seidauk iha uma diak ida hodi fila fali ba. Triste liu tan, sidadaun mate no lakon, hamutuk nain haat nulu resin ida.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

URA Feto Sempre Apoiu Mane

DILI, STLNEWS.co – Tempu difisil feto sempre apoiu mane iha luta ba Ukun Rasik An (URA), ikus hetan independensia, kontribuisaun konta hotu feto ho...

Loron Ba Loron Jose Nia Rendimentu Menus

DILI, STLNEWS.co – Negosiante Jose Nascimento Nunes, neebe faan ropa obralan iha area Bairru Pite, sente triste ho situasaun pandemia Covid- 19 nee, tanba...

Kandidatu An PR, Tenke Hatene Linguistika

DILI, STLNEWS.co – Jurista Timoroan Sergio Dias Quintas dehan, individu neebe hakarak kandidatu ba Prezidente Republika (PR), tenke hatene linguistika no labele sai opozisaun. "Primeiru,...
%d bloggers like this: