PR: TL Hasoru Tan Sofre No Dezastre Inundasaun; Ukun Nain Presiza Halo Refleksaun Seriu

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guterres Lú Olo hatete povu Timor leste liu liu populasaun neebe mak iha Dili, sofre dala ida tan ba dezastre natural liu husi inundasaun hodi husik hela terus boot ba povu.

Prezidente Republika Francisco Guterres Lú Olo hatoo kestaun nee liu husi komunikadu imprensa iha Palasiu Prezidente, Bairru Pite, Domingo Kalan (04/04/2021).

“Segundu lugar hau hakarak hatoo ba povu tomak iha Timor leste partikularmente ba populasaun Dili laran nia, ita hotu sofre dala ida tan bencana boot ida, dezastre boot ida hahu desde hodikalan too madrugada ohin dadersan tuku rua too mai ohin neebe udan boot halo inundasaun ba ita nia kapital Dili. Hau fiar katak ho dezastre boot nee dezastre natural ida nee husik hela tan terus boot ba populasaun iha kapital Dili hanesan mos iha fatin sira seluk neebe hetan situasaun hanesan.” hatete PR Lú Olo.

Prezidente Republika hatete ho situasaun ida nee PR mos bele halo komparasaun hanesan kalamidade boot ida, kalamidade ida seluk mak corona virus neebe oras nee infrenta hela dadauk, maibe mosu tan kalamidade ida nee hodi husik hela terus ba povu liu liu ba familia sira neebe hetan mate.

“Ohin informasaun too katak nain sia (9) mak mate, sira nee terus teb-tebes, Prezidente Republika hakarak liu husi komunikadu ida nee hakarak hatoo sentidu kondelensia ba familia sira neebe mak lakon iha inundasaun ida nee, nomos manifesta ninia solidaridade tomak ba populasaun Dili nomos povu tomak iha Timor leste nia.” katak Lú Olo.

PR hatutan iha situasaun nee governu presiza halo levantamentu ida, nunee bele hatene populasaun hira mak mate. No presiza mos ajuda ba populasaun sira.

“Hau hein katak ho situasaun ida nee nia laran, governu bele halo levantamentu ida para bele hatene loloos dezastre nee fo prejuiju hira ba ita nia populasaun sira, nomos mate hira ba populasaun sira tenke iha informasaun dala uluk liu, dehan nain sia mak mate bele liu tan, ida nee maibe tuir mai governu sei halo levantentu de dadus para hatene lolos i oinsa governu haree atu ajuda ba ita nia populasaun sira nee” tenik nia.

Aman ba nasaun nee mos hatoo ba populasaun tomak katak dezastre neebe mak iha Dili ho ida nee dala rua, uluk tinan kotuk akontese no ohin akontese fila fali iha sidade Dili.

Xefe estadu hatutan haree ba dezastre neebe mak akontese ida nee halo ukun nain hotu presiza halo refleksaun seriu.

“Dezastre ida nee lori ita atu halo refleksaun seriu liu liu konaba ita nia ukun durante tinan 10 nia, hau lakoi fo sala ba ema ida, neen fo sala ba ukun nain sira, maibe hau hakarak husu deit ita hotu halo refleksaun seriu oinsa mak ita bele hadia ita nia kapital ida nee, atu nunee labele fo dezastre no susar ida nee ba ita nia povu. Hau nia liafuan mak nee deit, hau dezeza imi hotu diak nafatin, hakuak boot ba povu doben Timor leste, obrigado.” katak Lú Olo.

Iha biban nee PR mos hatoo Boas Festa do Santa Pascoa ba povu doben Timor Leste partikular iha kapital Dili, dezezu katak ho nain Jesus nia resurisaun bele fo bensa tomak fila fali ba Timor oan hotu.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here