PR Vizita Traballu Ho Povu Baucau

Prezidente Republika Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guterres Lú Olo halo vizita traballu ho povu iha Munisipiu Baucau durante loron tolu nia laran.

Liu husi komunikadu neebe mak STL asesu husi Media PR, Tersa kalan (15/12/2020) hatete Prezidente Republika, Francisco Guterres Lú Olo, sei halao vizita traballu iha munisípiu Baucau iha 16-18 Dezembru 2020.

Durante loron-tolu iha Baucau, Prezidente Republika sei haree ho besik kondisaun eskola publika, sentru saude, atividade produtiva no dialogu ho autoridade lokal no komunidade hodi rona no hatan preokupasoins kona-ba dezenvolvimentu nasional.

Prezidente Republika sei vizita Eskola Sekundaria Jerál Kilik Uaigae no Ensinu Baziku Caibada, empreza ACELDA Unip, Grupu Feto Produtores HAFUKU, Ensinu Baziku Sentral Aubaca, Hospital Referal Eduardo Ximenes ‘Horex’, selebrasaun natal hamutuk ho orfaun no ema ho defisiensia, simbolikamente entrega ai-oan ba Adminstrador Postu Administrativu neen no dialogu ho autoridade lokal no komunidade iha munisípiu Baucau.

Membrus Governu neebe sei akompana Prezidente Republika mak Vise Primeiru Ministru no Ministru Planu no Ordenamentu, Ministru Koordenador Assuntu Ekonomiku, Ministru Justisa, Ministru Petroleu no Minerais, Ministru Administrasaun Estatal, Ministra Saude, Ministru Edukasaun, Juventude no Desportu, Ministru Obras Publikas, Ministru ba Assuntu Parlamentares no Komunikasaun Sosial, Ministru Turismu, Komersiu no Industria, Ministru Agrikultura no Peskas, Ministru Asuntu Kombatentes Libertasaun Nasional, Sekretariu Estadu Ambiente, Sekretariu Estadu ba Formasaun Empregu, Sekretariu Estadu ba Terras e Propriedades, Sekretariu Estadu Kooperativas, Sekretariu Estadu Juventude no Desportu no Sekretariu Estadu Arte no Kultura.

Tuir planu, Prezidente Republika sei vizita munisípiu 12 no Rejiaun Administrativu Espesial Oecusse-Ambeno (RAEOA) atu kontinua haree ho besik dezenvolvimentu sosial, ekonomika no polítiku iha nível baze no rona hanoin sira husi komunidade. Prezidente Republika halo ona vizita traballu iha Munisípiu Viqueque, Covalima, Lautem no Ermera.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here